Hannes Hólmsteinn Gissurarson er gestur Markaðarins sem sýndur er á Hringbraut í kvöld klukkan 21:00.
Í þættinum segir Hannes að eftir fall sósíalismans hafi vinstrisinnaðar stjórnmálahreyfingar átt undir högg að sækja um langt skeið. „Það var undantekning á 10 til 20 árum eftir fall sósíalismans. Þá sátu vinstrimenn algjörlega lamaðir og höfðu ekki nein svör við frjálshyggjunni.“
„Það var ekki bara það að sósíalisminn hafði gengið illa í Rússlandi og Kína og þeir horfið frá sósíalisma í báðum löndum, heldur hafði líka tekist mjög vel með hagstjórn á Vesturlöndum. Fólk eins og Thatcher og Reagan náði mjög góðum árangri og hagstjórnarhugmyndir Milton Friedman voru teknar upp í Mið- og Austur-Evrópu. Þannig að þetta var alveg sérstakur tíðarandi,“ segir Hannes.
Prófessorinn heldur því fram að téður tíðarandi hafi einmitt haft mikið að segja um hversu aðsópsmikill hann hefur verið í þjóðmálaumræðu á undanliðnum áratugum: „Ástæðan til þess að ég er stundum talinn áhrifamikill á Íslandi, er held ég ekki að ég hafi verið svona snjall. Ástæðan er sú að ég var, kannski fyrir tilviljun, samferða tíðarandanum. Það var á þessa leið, á seinni hluta níunda áratugarins og allan tíunda áratuginn og raunar fram að fjármálakreppunni 2008.“
Þátturinn er sýndur sem fyrr segir á Hringbraut klukkan 21:00