„Næstum án undantekningar heyri ég eiginkonur manna hliðhollra Miðflokknum segja við mig: Ég kýs ekki Miðflokkinn ef Gunnar Bragi Sveinsson býður sig fram,“ segir Halldór Gunnarsson, fulltrúi í flokksráði Miðflokksins, í aðsendri grein í Morgunblaðinu í dag.
Tilefnið greinar Halldórs er aukalandsþing Miðflokksins sem haldið var um liðna helgi, en Halldór segir að samkvæmt lögum flokksins sé heimilt að boða til slíks þings ef brýna nauðsyn ber til. Halldór veltir fyrir sér hver þessi brýna nauðsyn hafi verið.
„Var það til að hlusta á frábæra ræðu formannsins? Hann skilgreindi stefnu flokksins og helstu áherslur fyrir komandi kosningar, sem yrðu að ná til kjósenda, þannig að flokkurinn næði þeirri stöðu að komast í næstu ríkisstjórn, til þess að geta staðið vörð um sjálfstæði landsins, varið atvinnuvegi og grunngildi og hlúð að þeim sem veikast standa. Eða var aukalandsþingið haldið til þess að tryggja stöðu Gunnars Braga Sveinssonar með því að breyta lögum flokksins og leggja niður varaformannsembættið, en viðhalda samt óbreyttri stöðu Gunnars sem formanns þingflokksins með sömu áhrifum og áður?“
Halldór telur að brýnt hafi verið að ákveða hver staða Gunnars Braga ætti að vera. Það hafi þó ekki komið fram í beinni tillögu, hvað þá að það hafi verið sagt.
„Í viðræðum við flokksmenn um þetta hef ég heyrt til skiptis að staða hans hefði verið tryggð óbreytt eða að með þessu hafi flokkurinn losnað við hann. Ef flokkurinn á að ná þeirri stöðu sem formaðurinn talaði fyrir verður flokkurinn að ná jafnt til karla og kvenna, sem ég tel að flokkurinn muni ekki gera með framboði Gunnars Braga Sveinssonar við næstu alþingiskosningar,“ segir hann.
Hann vísar í skoðanakannanir sem sýna að konur kjósa síst flokkinn og þetta staðfesti síðasta framboð flokksins til sveitarstjórnar á Austurlandi á sinn hátt.
„Næstum án undantekningar heyri ég eiginkonur manna hliðhollra Miðflokknum segja við mig: Ég kýs ekki Miðflokkinn ef Gunnar Bragi Sveinsson býður sig fram. Þegar ég spyr um ástæður er svarið það sama, sem ég þarf ekki að endursegja, því allir virðast sammála um ástæðuna,“ segir hann og bætir við að bændur hliðhollir Miðflokknum hafi sagt það sama, að viðbættri gagnrýni á forystu Gunnars sem utanríkisráðherra, meðal annars vegna viðskiptabanns Rússa og að ekki var ákveðið endanlega að afturkalla umsókn um inngöngu í ESB.