Halldór Benjamín Þorbergsson, framkvæmdastjóri Samtaka atvinnulífsins, hefur haft í mörg horn að líta að undanförnu enda lífskjarasamningurinn í uppnámi og margt sem bendir til þess að honum verði sagt upp um mánaðamótin.
Halldór sló þó á létta strengi á Twitter-síðu sinni á föstudagskvöld þar sem hann opinberaði vandamál sem eflaust margir karlmenn kannast við.
„Það er alveg sama hversu margar peysur ástkær eiginkona mín eignast. Alltaf skal hún vera í peysu af mér,“ sagði Halldór.
Konráð S. Guðjónsson, hagfræðingur viðskiptaráðs, sagði að engin ástæða væri fyrir Halldór að örvænta. Þetta væri merki um sterkt hjónaband. „Sterkara tákn um hjónaband heldur en giftingarhringar. Þetta hafa rannsóknir margoft sýnt.“
