Jeffrey Ross Gunter, sendiherra Bandaríkjanna á Íslandi, baðst undan viðtali við fréttastofu Stöðvar 2 og Vísis en fyrirspurn var sent til sendiráðsins í gær um málið. Að því er kemur fram í frétt Vísis svaraði talsmaður sendiráðsins, Patrick Geraghty, fyrirspurnininni.
„Þar til yfirstandandi deilur um kosningarnar eru leystar er ekki viðeigandi að við tjáum okkur frekar um þær,“ sagði Geraghty í svari sínu til fréttastofunnar. Vísir segir enn fremur að Geraghty hafi sagði aðaláherslu kosninganna hafa verið að tryggja heilindi framvindu kosninganna.
Líkt og áður kemur fram hafa fjölmiðlar lýst því yfir að Joe Biden hafi sigrað kosningarnar í Bandaríkjunum og því sé Donald Trump á leiðinni úr embætti. Enn á þó eftir að staðfesta niðurstöðurnar endanlega.
Gunter var tilnefndur í embættið af Trump árið 2018 og var hann síðan samþykktur árið 2019. Gunter hefur áður komist til tals í íslenskum fjölmiðlum, nú síðast þegar hann sakaði Fréttablaðið um falsfréttaflutning og afturkallaði boð Fréttablaðsins á blaðamannafund aðmíráls í lok október.
Hann er talinn dyggur stuðningsmaður Donalds Trump og hefur oft á tíðum tekið undir orðræðu forsetans, til að mynda með því að kalla COVID-19 veiruna „Kínaveiruna.“ Hann sagðist fyrr á árinu óttast um öryggi sitt og vildi til að mynda fá að bera skotvopn.
