„Þetta er ljóta ógeðið, að láta það óáreitt að nokkrar fjölskyldur, varla fleiri en 5-7, stingi í eigin vasa arðinum af auðlindunum sem Íslendingar börðust svo til alla síðustu öld að ná yfirráðum yfir,“ segir Gunnar Smári Egilsson, stofnandi Sósíalistaflokksins, á Facebook-síðu flokksins.
Gunnar gerir frétt Viðskiptablaðsins frá því í morgun að umtalsefni, en í fréttinni kom fram að hagnaður tíu stærstu útgerðarfyrirtækja landsins hafi aukist um helming milli ára. Nam hann 29 milljörðum króna árið 2019. Hagnaður Samherja nam til dæmis rúmum 9 milljörðum og hagnaður Brims 4,6 milljörðum. Bæði fyrirtæki greiddu út talsverðan arð: Brim 1.833 milljónir og Samherji Iceland ehf. 687 milljónir. Allar tíu útgerðirnar skiluðu hagnaði, mismiklum þó.
Gunnar Smári bætir við:
„Það var í raun til lítil, gerspillt stjórnmálastétt færði örfáum auðlindir á silfurfati. Við lifum kolsvartan kafla í Íslandssögunni, framtíðin mun hía á okkur eins og við eigum skilið; heimsk og undirgefin, full af þrælsótta beygjandi okkur fyrir þjófum og þjóðníðingum.“
