Gunnar Þorsteinsson, oft kenndur við Krossinn, greinir frá því í færslu á Facebook síðu sinni að hann verði lagður inn á Landspítala klukkan átta í fyrramálið.
„Þar ætla reyndir læknar að framkvæma á mér hjartaþræðingu. Ég bið þess að þetta fari vel og góður Guð stjórni höndum og hug læknanna,“ segir Gunnar í færslunni.
Gunnar hefur áður tjáð sig um veikindi sín á Facebook en hann greindi frá því í síðasta mánuði að undanfarið hafði hann verið með mikinn verk fyrir hjartað sem hann leiddi oftast hjá sér.
Hann ákvað loksins að láta athuga málið og sagði læknirinn að hann væri með kransæðaþrengingu og þyrfti því að fara í þræðingu sem fyrst.
Að sögn Gunnars hlakkar hann til aðgerðarinnar. „Ég tel tel það mikla mildi að þetta var leitt í ljós. Páll postuli sagði að lífið væri Kristur og dauðinn ávinningur. Ég tek undir það,“ segir Gunnar í dag.
„Eflaust eru læknavísindin að fresta dýrðarfundi mínum við Drottinn um nokkurt skeið. Verði Guðs vilji.“
