„Ég dáist að þér og þakka fyrir fólk í þessum heimi eins og þig. Þú ert raunverulega einhver sem breytir lífi fólks til hins betra,“ segir Guðrún Brynjólfsdóttir í færslu á Facebook síðdegis í gær sem vakið hefur mikla athygli.
Í færslunni segir Guðrún frá ótrúlegri góðmennsku sem hún upplifði í Bónus. Guðrún rekur atburðarásina í færslunni og má segja að hún sýni rétta jólaandann.
„Hvað hef ég gert til að eiga þetta skilið?,“ spyr Guðrún í byrjun færslunnar en þessari spurningu varpaði hún fram þegar hún sat úti í bíl eftir Bónusferðina, hágrátandi.
„Ástæðan var ekki sú að ég væri sorgmædd eða óhress, heldur ég hafði upplifað góðverk sem kom heldur betur flatt upp á mig,“ segir Guðrún og bætir við að hún hafi verið að versla og ung kona verið á undan henni í röðinni.
„Hún var ekki að kaupa neina matvöru, heldur gjafabréf og bauð mér að vera á undan sér á meðan hún beið eftir þjónustu. Ég þáði það, og renndi vörunum mínum í gegn, nema ég gleymi smotterý og fæ að hlaupa inn í búð að sækja það,“ segir hún.
„Þegar ég kem til baka er verið að afgreiða ungu konuna og vörurnar mínar biðu skannaðar við endann á afgreiðsluborðinu fyrir utan það sem ég hafði gleymt inni í búð sem átti eftir að skanna. Ég beið því bara og bað svo unga manninn að bæta þessu við það sem ég átti eftir að borga. „Nei, það er búið að borga matinn - konan á undan þér ákvað að borga þetta líka."
Óhætt er að segja að þetta hafi komið flatt upp á Guðrúnu sem taldi að konan hefði óvart verið rukkuð fyrir hennar innkaup. „Ó jeminn, hún hefur óvart verið rukkuð fyrir minn part,“ segi ég í geðshræringu og fannst það skelfilegt að ókunnug kona hefði verið rukkuð fyrir matinn minn.“
Raunin var þó önnur eins og Guðrún lýsir í færslunni.
„Nei, hún sagði að hún ætlaði að borga þetta" segir ungi drengurinn á kassanum. Ég hleyp því út og leita að konunni, því ég vildi millifæra á hana. Fann hana ekki í myrkrinu. Miður mín. En svo kemur hún keyrandi - ég veifa henni og bið hana að stoppa - segi við hana: „Heyrðu elskuleg, ég held að þú hafir verið rukkuð fyrir matinn minn, ég vil fá að borga þér."
Guðrún segir að konan hafi ekki tekið það í mál. „Nei alls ekki, segir hún. Ég ætlaði að borga þetta.“ Guðrún segist hafa spurt hvers vegna hún vildi borga fyrir hana og konan svarað af því bara, brosað og óskað henni svo gleðilegra jóla.
„Ég stari á hana undrandi og spyr eins og fáviti: „Hvað á ég að segja við þig eiginlega?“
En þá sagði konan: „Segðu bara takk og Gleðileg jól.“
„Svo brosti hún bara og keyrði í burtu á meðan ég stamaði Takk og eitthvað .. sem ég ég skyldi ekki einu sinni sjálf. Hún valdi mig til að gleðja þennan dag. Þetta var ekki afþví að ég gat ekki borgað, heldur bara afþví að hún vildi gleðja. Ég settist inn í bíl og hágrét á meðan ég sagði frá þessu á Instagram. Ég vona að hún sjái mögulega þessa færslu. Við ungu konuna langar mig að segja: TAKK fyrir mig. Þú þurftir ekki að gera þetta, en gerðir af góðmennsku og hjartagæsku.“
Guðrún segist virkilega kunna að meta svona góðverk og langar hana að gera það sama fyrir einhvern annan í jólamánuðinum.
„Einhvern sem ég þekki ekki neitt, og valin af handahófi. Þú elsku stelpa settir eitthvað af stað sem vonandi margir taka sér til fyrirmyndar. Ég dáist að þér og þakka fyrir fólk í þessum heimi eins og þig. Þú ert raunverulega einhver sem breytir lífi fólks til hins betra. Ég þekki þig ekki neitt - en í mínum huga ertu mikilvæg og dásamlega falleg manneskja,“ segir hún og bætir við að myndina hafi hún tekið af sér grátandi í bílnum því hún vissi ekki hvað hún átti að gera eða segja.