Guðni Már Henningsson, fyrrverandi útvarpsmaður, er svo ánægður með lífið á Tenerife að hann hyggst sækja um fasta búsetu á eyjunni sem er sú stærsta og fjölmennasta á Kanaríeyjum. Guðni Már fluttist til Tenerife vorið 2018.
„Já, ég er bara sestur hér að og ég hef það svo fínt hér. Ég þarf ekki að hafa áhyggjur af húsnæði eða leigu eða neinu slíku. Mín laun duga fyrir öllu sem ég þarf,“ segir Guðni Már í samtali við Hringbraut.
Guðni greindi frá því á Facebook-síðu sinni um helgina að hann ætlaði að sækja um fasta búsetu á Tenerife. Orðrétt sagði hann:
„Eftir helgi á ég von á því að ég drífi mig loksins að sækja um fasta búsetu hérna á Tenerife. Það hefur marga kosti í för með sér og hví skyldi ég ekki nýta mér það? Hér vil ég vera það sem eftir er.“
Guðni er búsettur í höfuðborg Tenerife, Santa Cruz de Tenerife, og býr hann í fjögurra herbergja íbúð.
90 þúsund fyrir 4 herbergja íbúð
„Ég borga fyrir hana 600 evrur. Eftir að gengi krónunnar féll hefur leigan hækkað dálítið, ég borga 10 þúsund krónum meira núna en þegar ég kom. En upphæðin er sú sama í evrum,“ segir Guðni en 600 evrur eru nánast sléttar 90 þúsund krónur miðað við gengi dagsins í dag.
Það kannast margir við rödd Guðna stjórnaði útvarpsþættinum Næturvaktinni á Rás 2 um langt skeið. Þegar hann flutti út á sínum tíma nefndi hann hátt leiguverð hér á landi sem eina helstu ástæðuna.
„Leiguverð á Íslandi er svo fáránlega hátt að það tekur engu tali. Það kom í veg fyrir áframhaldandi búsetu mína á Íslandi. Punktur og basta,“ sagði Guðni.
Maturinn miklu ódýrari
Í samtali við Hringbraut segir Guðni að varla sé hægt að bera það saman að búa á Íslandi annars vegar og Tenerife hins vegar. Leiguverð er eitt og framboð af húsnæði er svo annað. „Hér get ég valið um íbúðir og hús – nefndu það. Matvara er miklu ódýrari, þrefalt ódýrari jafnvel,“ segir hann en dæmigerð innkaupakarfa sem inniheldur til dæmis nautahakk og kjúkling kostar hann um 30 evrur, eða 5.000 krónur.
Þegar Guðni er spurður hvers hann saknar frá Íslandi nefnir hann dætur sínar fyrst af öllu. „Ég sakna þeirra mest. En fyrir utan það,“ segir Guðni og bætir og svo við eftir langa þögn: „Mér dettur ekkert í hug skal ég segja þér. Stundum langar mig jú í íslenskan mat eins og saltkjöt og hangikjöt og hamborgarhrygg. Og þegar ég sé myndir af miklum snjó þá hefur mig langað að taka smá rúnt á jeppa,“ segir Guðni en það er ekki mikið um snjó í sólinni á Tenerife.
Gefur út ævisöguna
Guðni situr ekki auðum höndum en þegar hann flutti út setti hann sér það markmið að vinna á hverjum einasta degi. Hann hefur staðið við það en á morgnana fer hann á kaffihús, fær sér kaffi og situr svo við skriftir í þrjá til fjóra tíma. Svo fer hann heim, hreinritar textann og skrifar hann inn á tölvu. Guðni gaf nýlega út ljóðabók og þá hefur hann lokið við að skrifa æviminningar sínar.
„Hún er í yfirlestri hjá Karli Th. Birgissyni og ég stefni á að hún komi út í október eða nóvember,“ segir Guðni sem ætlar að fylgja bókinni eftir, koma til Íslands og lesa upp úr bókinni.