Guðni Ágústsson, fyrrverandi landbúnaðarráðherra, segir að atburðir síðustu mánaða hafi minnt á mikilvægi þess að Íslendingar standi vörð um heilbrigði búfjárstofna hér á landi.
Bendir hann á að pensilínnotkun í búfénaði hér á landi sé með minnsta móti, en annað sé uppi á teningnum víða annars staðar.
„Óhófið í notkun á pensilíni í búfé í hinum vestræna heimi boðar miklu harðari glímu við dauðann en krabbameinið og Covid-19. Og leiða má getum að því að glíman við Covid sé verri í löndum sem komast upp með glæpsamlega meðferð á pensilíni í dýr og afleiðingar birtast í fólki sem hefur pensilínóþol,“ segir Guðni í grein sem hann skrifar í Fréttablaðið í dag.
Í grein sinni vísar Guðni í grein Steins Jónssonar, prófessors í lungnasjúkdómum á Landspítalanum og læknadeild Háskóla Íslands. Í grein sinni talaði Steinn um lága dánartíðni hér á landi í hlutfalli við fjölda smitaðra. Sagði Steinn að mismunandi dánartíðni eftir löndum væri ráðgáta sem hljóti þó að snúast um gæði lýðheilsuaðgerða og heilbrigðisþjónustu á hverjum stað.
Vísar Guðni orðrétt í grein Steins þar sem hann sagði: „Dauði vegna veirulungnabólgu stendur reyndar oft í sambandi við bakteríusýkingar sem koma í kjölfar veirusýkingarinnar og þar kann að vera lykilatriði að hér á landi er tiltölulega lítið sýklalyfjaónæmi baktería fyrir hendi vegna minni notkunar sýklalyfja (í landbúnaði hér) heldur en til dæmis á Ítalíu eða í Bandaríkjunum.“
Guðni segir að í umræðunni um hættuna sem stafar af óvarlegum innflutningi á hráu kjöti til Íslands hafi ráðamenn þjóðarinnar metið þessi sjónarmið léttvæg og opnað landið í hálfa gátt.