Guðmundur Gunnarsson, fyrrverandi bæjarstjóri á Ísafirði og fyrrverandi fréttamaður, hefur ekki keypt sér sjónvarp síðan árið 1998. Guðmundur segir frá þessu í skemmtilegri færslu á Twitter-síðu sinni.
„Fólk er svo duglegt að endurnýja sjónvörpin sín að ég hef ekki þurft að kaupa mér sjónvarp síðan 1998. Fæ alltaf fínt nokkurra ára gamalt tæki gefins þegar einhver ættingi telur sér trú um að hann þurfi nauðsynlega meiri háskerpu í líf sitt. Mæli með,“ segir hann.
Hann segir að amma hans og afi hafi gefið honum fyrsta stráheila tækið. „Þá hafði amma farið í sjónmælingu og þau ákveðið að kaupa frekar stærra sjónvarp en ný gleraugu. Sönn saga,“ segir hann og bætir að lokum við:
„Eina tækið sem ég hef borgað fyrir var Thomson túba á tilboði í BT. Þá var ég ekki búinn að fatta hvað það er mikið af stráheilum tækjum þarna úti. Sé enn eftir 40 þúsund kallinum.“