Guðmundur Ingi Þóroddsson, formaður Afstöðu, félags fanga og áhugamanna um bætt fangelsismál og betrun, rifjaði upp athyglisverða sögu á Facebook-síðu sinni í gær vegna jarðskjálftans stóra sem reið yfir suðvesturhorn landsins.
Eins og frægt er orðið hljóp Helgi Hrafn Gunnarsson, þingmaður Pírata, úr ræðustól Alþingis þegar hann varð var við skjálftann. Margir hafa stigið fram síðan þá og sagt að þeir hefðu trúlega brugðist nákvæmlega eins við.
Guðmundur segist í tvígang hafa upplifað jarðskjálfta þegar hann var á Litla-Hrauni og segir hann að í bæði skiptin hafi fangaverðirnir hlaupið út og skilið fangana eftir.
„Það var ekkert fyndið þá en má hlæja af því núna. Helgi gerði hárrétt enda okkur kennt þetta áður fyrr,“ segir hann.