Guðmundur Gunnarsson, fyrrverandi bæjarstjóri Ísafjarðarbæjar, minnist þess á Facebook-síðu sinni að eitt ár er nú liðið frá snjóflóðinu á Flateyri.
Guðmundur var bæjarstjóri á þessum tíma og viðurkennir hann að þessi ársgamla minning hafi sent smá hroll niður eftir bakinu á honum í gærmorgun. Guðmundur deildi þá færslu sinni sem hann skrifaði á Facebook þann 15. Janúar í fyrra þar sem hann kom meðal annars á framfæri ólýsanlegu þakklæti til þeirra sem komu að björgunaraðgerðum og sáu til þess að ekki fór verr.
„En þegar ég rifja þetta upp þá sé ég líka fyrir mér allt fólkið. Í háskerpu. Teinrétt, sterkt og skælbrosandi fólk og samfélag. Það er myndin sem situr eftir í kollinum á mér. Hún er sterkari en hrollurinn,“ segir Guðmundur sem segir að það sé eins og þessir ársgömlu atburðir vilji trana sér fram um þessar mundir.
„Fyrir nokkrum dögum hnippti ung kona í öxlina á mér í Kringlunni. "Hæ, manstu ekki eftir mér?"
Um var að ræða hina fimmtán ára gömlu Önnu Sóley Ericsdóttur Wolf, brosandi undir sóttvarnargrímunni, en Anna Sóley lenti í snjóflóðinu. Björgunarsveitarmenn grófu hana upp úr flóðinu og sagði hún meðal annars ótrúlega sögu sína í viðtali við RÚV í fyrra.
„Ég hafði ekki hitt hana frá því fyrir vestan. Frá því hetjurnar á Flateyri björguðu henni undan flóðinu. Frá því hún talaði beint inn í hjartað á okkur og lýsti ólýsanlegum náttúruhamhamförum af einlægni, ró og yfirvegun. Gerði okkur orðlaus.
Í gær var dagurinn hennar og allrar hennar fjölskyldu. Til hamingju Anna og co.“
