Guðmundur Franklín Jónsson forsetaframbjóðandi ætlar að lækka laun forseta um 50% nái hann kjöri í embættið. Guðmundur Franklín og Guðni Th. Jóhannesson eru tveir í framboði til forseta Íslands en kosið verður eftir innan við mánuð.
„Það fyrsta sem ég ætla að gera verði ég kosinn forseti er að virkja 25. grein stjórnarskrár lýðveldisins og lækka laun forsetans um 50%,“ segir Guðmundur Franklín á Facebook-síðu forsetaframboðs síns.
Samkvæmt lögum um laun forseta eru þau nú 2.985.000 krónur en þess má geta að Guðni Th. Jóhannesson hefur afþakkað allar launahækkanir til sín frá því hann var kjörinn árið 2016. Í frétt Hringbrautar frá 30. apríl síðastliðnum kom fram að sú upphæð væri komin yfir 10 milljónir króna.
Í einskonar frumvarpi sem Guðmundur birtir með færslu sinni segir hann að munur milli launa hæstu embættismanna og meðallauna í landinu sé orðinn of mikill.
„Í ljósi þess að áætlaður halli á ríkissjóði er nú tæplega 500 milljarðar og enn eru líkur á að sá halli geti aukist er eðlilegt að fólk í ábyrgðarstöðum, sem nýtur hárra launa á vegum ríkisins, taki á sig launalækkun. Þetta er gert í viðleitni til að lækka útgjöld ríkisins sem og hvatning til annarra æðstu embættismanna ríkisins að gera slíkt hið sama.“