Guðmundur Felix Grétarsson, sem gekkst undir ágræðslu á báðum handleggjum í janúar síðastliðnum, hefur birt magnað myndband á Facebook-síðu sinni í morgun.
Nú eru liðnir 9 mánuðir frá því Guðmundur gekkst undir aðgerðina í frönsku borginni Lyon og hefur bataferlið gengið vonum framar. Í myndbandinu segir Guðmundur frá því sem á daga hans hefur drifið undanfarnar vikur.
„Fyrir þau ykkar sem sáuð myndbandið mitt í maí þá gat ég hreyft tvíhöfðann lítillega. En núna get ég gert dálítið meira en það. Hann virkar nokkuð vel og styrkurinn í öxlunum, tvíhöfðanum og þríhöfðanum eykst dag frá degi,“ segir hann. Finnur hann bæði fyrir kulda og og snertingu ef þrýst er á á hægri handlegginn.
„Taugarnar vinstra megin eru að vaxa og ég er kominn með taugar fram í höndina. Ég get hreyft öxlina lítillega en hún er fjári þung.“