Bataferli Guðmundar Felix Grétarssonar, sem gekkst undir aðgerð þar sem græddar voru á hann hendur, gengur vel og hann hvetur fólk til að iðka þakklæti og ekki láta vandamálin skemma fyrir sér.
„Ég hlusta stundum á fólk segja að það að horfa á hlutina í raunhæfu samhengi sé einhvers konar Pollýönnu-leikur. Ég segi: Til fjandans með Pollýönnu. Ef við eigum við vanda að stríða, eru tveir kostir í stöðunni. Annaðhvort getum við gert eitthvað í því, eða ekki. Hvorugt tilfellið kallar á að við förum yfir um,“ skrifar Guðmundur Felix á Facebook-síðu sinni.
„Flest vandamála þinna eru ekki raunveruleg vandamál. Hlutirnir eru bara öðru vísi en þú vilt að þeir séu. Allt gæti allt eins verið verra, rétt eins og það gæti verið betra. Við höfum margfalt meira færi á að gera það sem við þurfum að gera þegar við erum hamingjusöm en þegar okkur líður hræðilega. Þannig að veljum þakklæti,“ skrifar Guðmundur Felix enn fremur.
Um fjórir mánuðir eru síðan aðgerðin var framkvæmd en Guðmundur Felix þurfti að bíða í mörg ár eftir líffæragjafa. Hann dvaldi langdvölum á sjúkrahúsi eftir aðgerðina en getur nú dvalið heima við að einhverju leyti. Hann er laus við að bera sárabindi allan daginn en ekki er enn ljóst hvort aðgerðin hafi heppnast að öllu leyti. Það mun tíminn leiða í ljós.