„Sé að margt fólk er óánægt með Einar Þorsteinsson og spurningar hans í Kastljósinu í gær. Ég er ekki sammála því. Hann var að mínu mati að sinna sinni vinnu, gegna sínu hlutverki,“ segir Guðmundur Andri Thorsson, þingmaður og rithöfundur.
Guðmundur kemur fjölmiðlamanninum Einari Þorsteinssyni til varnar á Facebook-síðu sinni en Einar – og raunar fjölmiðlar í heild – hafa verið gagnrýndir vegna umræðunnar um hópsmit á Landakoti. Einar ræddi við Pál Matthíasson, forstjóra Landspítalans, í Kastljósi í gærkvöldi og þótti nokkuð beinskeyttur.
Hjúkrunarfræðingurinn Elín Tryggvadóttir skrifaði færslu á Facebook í gærkvöldi sem vakti mikla athygli. Sagði hún að ekki hafi verið nóg að „steikja forstjóra“ Landspítalans á upplýsingafundinum í gær heldur var hann einnig „kolagrillaður“ í Kastljósi.
Sjá einnig: Elín segir hingað og ekki lengra: „Með grillveislum eins og þessum er traustið brotið niður“
Þessu er Guðmundur Andri ósammála og bendir hann á að óánægja hafi ríkt meðal aðstandenda sjúklinga á Landakoti. Þær spurningar sem þeir hafa haft þurfi að viðra og ræða, jafnvel þó óþægilegar séu.
„Þetta fannst mér Einar gera af kurteisi og festu. Páll Matthíasson stóð sig mjög vel í hlutverki sínu við að vera í forsvari fyrir þessa stofnun, og hafi það verið almenn tilfinning áhorfenda að loknum þætti, að starfsfólk spítalans hafi unnið vel og gert allt sem í þess valdi stóð – eins og ég tel raunar að sé raunin – þá var þetta góð umræða og til þess fallin að hreinsa andrúmsloftið.“
Hér má sjá viðtalið umtalaða í gærkvöldi.