Guðmundur Andri Thorsson, þingmaður Samfylkingarinnar, skellti sér á Laugaveginn í dag þegar stutt hlé var gert á þingstörfum. Nýtti Guðmundur hléið til að skjótast til Guðsteins þar sem hann náði sér í nærbuxur.
Guðmundur Andri segir frá þessu í stuttri en skemmtilegri færslu á Facebook. Í dyrunum við verslun Guðsteins segir Guðmundur Andri hafa hitt ánægjulegan mann og skipst á ánægjulegu hjali við hann. Hann hélt svo áfram niður Laugaveginn en þar hitti hann mann sem stöðvaði hann með handarhreyfingu og íbyggnu augnaráði.
Um var að ræða snyrtilegan mann í fallegum jakka sem horfði lengi á Guðmund. Hann tók svo til máls með miklum þunga, segir Guðmundur og skrifar svo hvað fór þeim á milli.
„Hann: Þú ert þjóðþekktur maður ...
Þýðingamikil þögn.
Hann: Þú ert vel máli farinn og ágætur maður. En þú ert í Samfylkingunni ...
Þögn.
Hann: Samfylkingin er saumaklúbbur. Og saumaklúbbur á ekkert erindi á þing.
Þögn.
Hann með miklum þunga: Hvað ERTU að gera?
Ég: Þú ert í fallegum jakka.
Þögn.
Ég: Eigðu góðan dag.
Hann: Ekkert svona ljóð við mig!
Og héldum hvor sinn veg.“