Guðfinna Jóhanna Guðmundsdóttir, fyrrverandi borgarfulltrúi Framsóknar og lögmaður, lenti í óskemmtilegri reynslu þegar hún var í leigubíl í miðborg Reykjavíkur í morgun.
„Situr mjög pirruð í leigubíl eftir að hafa keyrt ofan í holu á Hringbraut og sprengt dekk. Hvernig er það er alveg vonlaust að halda þessum götum í borginni í lagi,“ spurði Guðfinna á Facebook-síðu sinni.
Bíllinn var á ferð við gatnamót Hringbrautar og Framnesvegar þegar óhappið varð.
Kristín Soffía Jónsdóttir, borgarfulltrúi Samfylkingar, skrifar athugasemd við færslu Guðfinnu og bendir henni á að hún þurfi að beina réttlátri reiði sinni að Vegagerðinni en ekki borgaryfirvöldum.
„Það var einmitt það sem ég benti leigubílstjóranum á þegar hann ætlaði að fara kenna meirihlutanum um þetta. Þingmenn Reykjavíkur gætu t.d. eytt tímanum sínum í þessi mál, mér sýnist að þeim vanti verkefni,“ segir Guðfinna.
Gústaf Níelsson spurði Guðfinnu hvort hún gæti ekki bara skipt um dekk, þegjandi og hljóðalaust. Guðfinna svaraði að bragði að það eina sem hún gerði þegar kæmi að bílum væri að setja á þá bensín. Allt annað væri karlmannsverk, þar með talið að þrífa þá og henda rusli úr þeim.
„Tek undir þetta,“ sagði Gústaf.