Guðni Már Henningsson, útvarpsmaðurinn góðkunni, er væntanlegur til Íslands á næstunni í tilefni af útgáfu endurminninga sinna. Eins og kunnugt er býr Guðni á Tenerife þar sem hann hefur það notalegt í góða veðrinu.
Guðni hugðist leigja sér bíl meðan á dvöl hans hér á landi stendur og leitaði hann til Facebook-vina sinna á dögunum um góð ráð í þeim efnum og hagstæðar bílaleigur. Það er skemmst frá því að segja að Guðni þarf ekki að borga stórfé fyrir bílaleigubíl því góðhjartaður maður setti sig í samband við hann og bauðst til að lána honum sinn bíl.
„Það hafði samband við mig maður í gær. Ég nefni ekki nafn hans en hann bauðst til að lána mér bíl í þrjár vikur í nóvember! Hann vildi fá eina bók í staðinn. Það þótti honum næg borgun. Ég er fullur þakklætis í garð þessa manns,“ segir Guðni Már en bók hans, Þó nokkur augnablik, kemur út í nóvember.
Guðni hefur þegar birt nokkur brot úr bókinni á Facebook-síðu sinni, en hann hefur unnið baki brotnu við skriftir undanfarna mánuði. Margir virðast bíða spenntir eftir bókinni og sagði Guðni Már frá því í morgun að bókin væri nánast uppseld – og það áður en hún kemur út.
„Þið sem hafið áhuga, drífið í að panta, ef þið eruð ekki þegar búin að því,“ sagði Guðni en hægt er að leita hann uppi á Facebook og panta hjá honum bók. Eins og hann bendir á fer hver að verða síðastur í þeim efnum.
