„Er Sjálfstæðisflokknum orðið algjörlega sama um frjálslynda kjósendur sína?“
Þessari spurningu varpar Gísli Marteinn Baldursson, fjölmiðlamaður og fyrrverandi borgarfulltrúi Sjálfstæðisflokksins, fram á Twitter-síðu sinni.
Tilefnið er frumvarp Pírata um afnám refsinga fyrir vörslur neysluskammta fíkniefna en eins og greint hefur verið frá var frumvarpið fellt í atkvæðagreiðslu í nótt. Athygli vekur að frumvarpinu var hafnað þó að í stjórnarsáttmála ríkisstjórnarinnar sé skýrt kveðið á um mildari stefnu í fíkniefnamálum.
Þar sagði orðrétt:
„Snúa þarf af braut harðra refsinga fyrir neyslu fíkniefna en styrkja aðgerðir gegn fíkniefnasölum, innflutningi og framleiðslu fíkniefna. Tryggja þarf fíklum viðunandi meðferðarúrræði með samvinnu dóms-, félags- og heilbrigðiskerfis.“
Gísli Marteinn veltir fyrir sér hvort Sjálfstæðisflokknum sé sama um frjálslynda kjósendur sína.
„Flokkurinn hefur vissulega alltaf verið samspil frjálslyndis og íhalds en þegar svona mál fær 0 atkvæði frá þingflokki D veltir fólk því fyrir sér hvort íhaldið sé alveg búið að kæfa frelsishugsunina.“