Gallharðir aðdáendur Simpsons-fjölskyldunnar ráku upp stór augu þegar þeir fylgdust með innsetningarathöfn Joe Biden og Kamölu Harris í embætti forseta og varaforseta Bandaríkjanna í gær.
Kamala var klædd í fallega fjólubláa dragt og undir henni var hún í fjólubláum bol og með einskonar perluhálsmen. Svo vill til að í einum tilteknum Simpsons-þætti, sem sýndur var í mars árið 2000, tók Lisa Simpson við embætti forseta Bandaríkjanna af Donald Trump. Þættirnir spáðu því nokkuð rétt fyrir um það að Trump ætti á einhverjum tímapunkti eftir að verða forseti Bandaríkjanna.
Eins og sést glögglega hér að neðan var Lisa klædd í fjólubláa dragt og undir henni var hún í fjólubláum bol og með perluhálsmen – í raun nákvæmlega eins klæðnaði og Kamala skartaði á innsetningarathöfninni í gær. Þetta hefur vakið athygli margra og eru sumir á því að hér sé ekki um neina tilviljun að ræða.
„Erum við að tala um að Kamala Harris hafi í alvöru mætt í innsetningararhöfnina í sömu fötum og Lisa Simpson í þættinum sem gerðist í framtíðinni þar sem hún var forseti sem hafði tekið við af Trump? Ef svo er, þá er það æðislegasta og lúmskasta vísun sem ég hef séð,“ segir varaborgarfulltrúinn Alexandra Briem á Facebook-síðu sinni og deilir myndinni sem sjá má hér að ofan. Hér að neðan má svo sjá brot úr Simpsons-þættinum frá árinu 2000.
