„Nú er komið að því að loka öllum veitingastöðum eða öldurhúsum í Reykjavík og nágrenni. Gera þetta strax,“ segir íþróttafréttamaðurinn Guðjón Guðmundsson, Gaupi, á Twitter-síðu sinni.
Það er ljóst að tölur um fjölda COVID-19-smita í samfélaginu eru Gaupa ekki að skapi og ljái honum hver sem vill. Nítján smit greindust í gær og í fyrradag voru smitin þrettán. Hafa fleiri smit ekki greinst á einum degi síðan apríl þegar faraldurinn var á hvínandi siglingu hér á landi.
„Fólk getur skálað í boðinu síðar. Þetta er að verða algjör þvæla. Þarf varla meira til en þessi 19 smit eða hvað,“ segir Guðjón.
Ljóst er að ekki eru allir á sama máli og Guðjón. Þannig hefur fréttavefur Vísis eftir Arnari Þór Gíslasyni, eiganda Irishman, Lebowski, Kalda, Dönsku kráarinnar og Enska barsins, að lengja þurfi opnunartíma skemmtistaða. „Það þarf að lengja opnunartímann og dreifa fólki, svo það séu ekki hópamyndanir.“
Rekja má þriðjung þeirra smita sem komið hafa upp á undanförnum dögum til vínveitingastaða í miðborginni.
Nú er komið að því að loka öllum veitingastöðum eða öldurhúsum í Reykjavík og nágrenni. Gera þetta strax.Covid. Fólk getur skálað í boðinu síðar. Þetta er að verða algjör þvæla. Þarf varla meira til en þessi 19 smit eða hvað.Eina.
— Guðjón Guðmundsson (@gaupinn) September 17, 2020