Gagnrýni á aðgerðirnar varasöm: „Þeir voru sendir aftur heim til að deyja eða vona það besta“

9. október 2020
22:13
Fréttir & pistlar

„Mikil er ábyrgð þeirra sem leggja til óheftari smit í landinu og tala gegn okkar bestu sérfræðingum í smitvörnum, sem nú eiga undir högg að sækja í þjóðfélagsumræðu og hjá ákveðnum hópum,“ segir Þórarinn Guðnason, formaður Læknafélags Reykjavíkur, í pistli á Facebook í dag. Þar lýsir hann ástandinu sem var á Ítalíu þegar verst lét í fyrri bylgjunni þar í landi og faraldurinn var í veldisvexti.

„Náttúruhamfarir, stríðsástand og svipuð orð ná ekki að lýsa ástandinu þar vel. Læknar sem höfðu minna að gera vegna ástandsins eins og meinafræðingar og bæklunarlæknar vour t.d. sendir út á bílaplan og látnir forgangsraða sjúklingum þar í bílum sínum,“ seigr hann.

„Spuringarnar sem þeir spurðu sjúklinga voru bara tvær: Hvað ertu gamall og ertu með undirliggjandi sjúkdóma? Ef svarið var eldri en 60 ára eða já við því að hafa undirliggjandi sjúkdóm var hlutverk þessara lækna að snúa þeim einstaklingum við og vísa þeim frá yfirfullum spítalanum. Þeir voru sendir aftur heim til að deyja eða vona það besta.“

Hann segir að þetta hafi verið öllum á Ítalíu gríðarlega þungbært ástand, „mikið þungbærara en afleiðingar sóttvarna sem þó eru ekkert grín, ég geri ekki lítið úr því.“

„Ég vona að við endum ekki þarna, það vill enginn ekki heldur þeir sem gagnrýna sóttvarnaraðgerðir. En ef ekki er hlustað á sérfræðingana okkar og ef álit þeirra og leiðbeiningar eru sveigð til eða hundsuð er það í alvörunni möguleg útkoma. Og það getur gerst á nokkrum dögum vegna veldisvarxtar smitanna.,“ segir Þórarinn.

„Og að lokum þá getum við verið að tala um að það sé afi þinn, amma, faðir eða móðir eða jafnvel langveiki litli bróðir þinn eða frændi sem verður snúið við á bílaplani Landspítala í Fossvogi.“