Fylgi Sjálfstæðisflokksins í nýrri könnun MMR dalar frá síðustu könnun. Þrátt fyrir það mælist flokkurinn með mest fylgi allra flokka, eða 21,9%. Það er tæplega fjórum prósentustigum læra en við síðustu mælingu MMR sem framkvæmd var í september.
Samfylkingin kemur þar á eftir og mælist fylgi flokksins nú 15,2%. Bætir flokkurinn við sig rúmlega tveimur prósentustigum frá síðustu könnun MMR. Fylgi Pírata minnkar frá síðustu könnun um eitt og hálft prósentustig og er það nú 13,5%.
Athygli vekur að Miðflokkurinn er kominn nokkuð vel yfir 10 prósenta fylgi. Fylgið mælist nú 11,6% en var 10,8% í síðustu könnun.
Framsóknarflokkur bætir við sig frá síðustu könnun og er fylgi flokksins nú 10,2%. Fylgi Viðreisnar mældist 9,7% en var 9,4% í síðustu könnun og fylgi VG heldur áfram að dala. Fylgið mælist nú 8,3% en var 8,5% í síðustu könnun.
Sósíalistaflokkur Íslands er á barmi þess að koma inn manni ef marka má niðurstöður könnunarinnar. Fylgi flokksins mælist nú 4,6% en var 4,3% í síðustu könnun. Flokkur fólksins mælist með 3,8% fylgi en var 3,6% í síðustu könnun.
Könnunin var framkvæmd 23. - 28. október 2020 og var heildarfjöldi svarenda 933 einstaklingar, 18 ára og eldri.
