„Rósa Björk kvaddi Vinstri græn í gær. Þó fyrr hefði verið. Rósa Björk hefur aldeilis látið eitt og annað yfir sig ganga,“ segir Sigurjón M. Egilsson, ritstjóri Miðjunnar, í pistli á vef sínum.
Þar fjallar hann um brotthvarf Rósu Bjarkar Brynjólfsdóttur úr þingflokki VG, en ástæðan er brottvísun íslenskra stjórnvalda á barnafjölskyldu frá Egyptalandi sem hefur beðið eftir úrlausn sinna mála í rúm tvö ár.
Sigurjón, sem fjallað hefur um stjórnmál um áratugaskeið, segir það vekja í raun undrun að Rósa BJörk hafi ekki yfirgefið flokkinn fyrir löngu.
„Hún var á móti stjórnarsamstarfinu. Ákvað að láta á það reyna. Þvílík þolinmæði. Eða hvað? Var Rósa Björk sammála svikum Katrínar Jakobsdóttur? Og er kannski enn? Katrín heillaði allt það fólk sem vill réttlátt samfélag. Katrín, þá sem stjórnarandstæðingur, hélt magnaða ræðu um að þau sem verst hafa getið ekki og megi ekki bíða eftir réttlætinu. Hreint mögnuð ræða. Og hvað svo? Ekkert.“
Sigurjón segir að Rósa Björk hafi skýra sýn í stjórnmálum en erfiðara sé að átta sig á félaga hennar, Andrés Inga Jónssyni sem er utan þingflokka eins og Rósa.
„Það er annað mál. Þess vegna má undrast að Rósa Björk hafi látið yfir sig ganga skýr svik Katrínar forsætisráðherra. Hún kýs að hluti þjóðarinnar hafi rétt um 240 þúsund krónur á mánuði. Vinstri græn hafa tapað vinstrihugsjóninni. Fyrir löngu. Þolinmæði Rósu Bjarkar hefur verið mikil. En Rósa Björk, betra er seint en aldrei.“