„Nú má vera að það sleppi að láta börn sækja skóla við þessar aðstæður, en er víst að það sé áhættunnar virði?“
Þessari spurningu er varpað fram í leiðara Morgunblaðsins í dag en þar er meðal annars fjallað um þá staðreynd að börn, bæði á leikskóla- og grunnskólaaldri, séu send í skólann nú þegar samkomubann er í gildi. Ekki liggur fyrir hver heldur á penna í umræddum leiðara en Davíð Oddsson er sem kunnugt er ritstjóri blaðsins.
Leiðarahöfundur nefnir bréf sem skólastjórnendur, kennarar og foreldrar fengu frá landlækni og sóttvarnalækni þar sem mikilvægi þess að börn sæktu skóla var áréttað.
„Þeir sem fengu bréfið hljóta að velta því fyrir sér hvers vegna þeim sem eru í forystu fyrir sóttvörnum er svo í mun að börn hópist saman og séu í návígi hvert við annað og kennara sína á þessum veirutímum. Minnka líkur á að smit dreifist með því að börn fari í skóla? Varla.“
Leiðarahöfundur nefnir svo að stórir hópar hafi farið í sóttkví vegna smita sem tengjast skólum. Nefnir hann í því samhengi forsætisráðherra en sonur hennar fór í sóttkví þar sem starfsmaður í skóla hans reyndist vera smitaður.
„Sem betur fer virðist þetta hafa farið vel en augljóst er af slíkum viðbrögðum við smiti starfsmanns í skóla að hætta getur verið á að smit berist þegar skólar eru starfræktir í miðjum veirufaraldri. Og til hvers? Vissulega þurfa börn að sækja skóla, en stafar námi þeirra mikil hætta af því þó að skólasókn, sem hvort eð er hefur verið stytt verulega, sé slegið á frest í fáeinar vikur og meiri áhersla lögð á heimanámið þann tíma?“