„Þetta er kannski ekki há upphæð en hún skiptir marga máli,“ segir Friðþjófur Helgi Karlsson, bæjarfulltrúi Samfylkingarinnar í Hafnarfirði, í samtali við Hringbraut.
Friðþjófur var einn þeirra bæjarfulltrúa sem lagðist gegn því að laun kjörinna fulltrúa myndu hækka á sama tíma og margir væru búnir að missa vinnuna vegna COVID-faraldursins. Tillaga Samfylkingarinnar um að laun bæjarfulltrúa yrðu fryst út þetta ár var felld á fundi bæjarstjórnar í lok aprílmánaðar og tók launahækkunin því gildi á dögunum.
Fyrir breytinguna var þóknun bæjarfulltrúa 286 þúsund krónur en verður 304 þúsund krónur á mánuði. Er áætlaður kostnaðarauki bæjarsjóðs vegna hækkunarinnar 8,3 milljónir króna á ári. Bæjarráðsfulltrúar Sjálfstæðisflokks og Framsóknar og óháðra hafa bent á að mánaðarlaun hafi verið óbreytt frá 2017 og hækkunin nú, rúm 6%, haldi ekki í við almenna launaþróun frá þeim tíma.
Friðþjófur segir að hann hafi ekki viljað að launin yrðu hækkuð þegar margir af hans umbjóðendum hafa upplifað atvinnumissi og jafnvel launalækkanir undanfarnar vikur og mánuði.
„En meirihluti Sjálfstæðisflokks og Framsóknar var ekki sammála mér og launin hækkuðu,“ segir hann.
Af þessu tilefni hefur hann ákveðið að gefa sína hækkun til samfélagsins, samtals um 200 þúsund krónur, í átta greiðslum sem munu meðal annars renna til góðgerðasamtaka. Þannig fór fyrsta greiðslan, 25 þúsund krónur, til góðgerðasamtakanna Samferða.
„Ég lýsti því yfir að ég myndi ekki taka við þessari hækkun ef hún kæmi til framkvæmda. En hún gerði það þannig að þetta er svona bein afleiðing af því. Þetta er kannski ekki há upphæð en hún skiptir marga máli,“ segir Friðþjófur að lokum.