Kolbrún Bergþórsdóttir, pistlahöfundur Fréttablaðsins, brýnir fyrir landsmönnum að standa vörð um frelsi fólks og segir mikilvægt að aflétta frelsissviptandi takmörkunum vegna COVID-19 faraldursins.
„Það er ekki hægt að ætlast til að fólk taki stórfelldri frelsissviptingu í lengri tíma af þolgæði. Það þarf að sjá ljós við enda ganganna en ef það kemur ekki auga á annað en ráðleysi yfirvalda þá mótmælir jafnvel þolinmóðasta fólk kröftuglega. Það eru skiljanleg og eðlileg viðbrögð,“ skrifar Kolbrún í pistli dagsins.
Ekki lausn að skella í lás
„Hinn yfirvegaði og farsæli sóttvarnalæknir, Þórólfur Guðnason, hefur sagt að stjórnvöld hafi ekki beitt hann þrýstingi þegar hann lagði fram erfiðar og misvinsælar tillögur.“ Þrátt fyrir það ríki ákveðin hneigð til einangrunar sem einhverjir vilja viðhalda með því að hafa landið lokað.
„Það er engin lausn á vandanum.“ Margt bendi til að kórónuveiran sé komin til að vera. „Þá þarf að takast á við það verkefni og það verður ekki gert með harkalegri og langri lok lok og læs stefnu. Sú leið skilar fjöldaatvinnuleysi, gjaldþrotum, andlegum veikindum og niðurbroti.“ Til að samfélagið þrífist þurfi að vera samgangur meðal manna.
Blessunarlega hafi takmarkanir hér á landi verið í minni mæli en annars staðar að mati Kolbrúnar. „Sætta má sig við slík höft í einhvern tíma en alls ekki til frambúðar. Íslenskir stjórnmálamenn hafa engan veginn lagt nægilega mikla áherslu á þetta.“ Einstaklings frelsi hafi ekki verið ofarlega á baugi í samfélaginu.
Treystir Sjálfstæðismönnum
Það megi þó ekki fara svo að frelsisskerðing þyki nánast sjálfsagt og eðlilegt viðbragð við erfiðu ástandi. „Það var því beinlínis upplífgandi að hlusta nýlega á dómsmálaráðherra, Áslaugu Örnu Sigurbjörnsdóttur, í Silfrinu á RÚV, tala af festu og ákveðni um mikilvægi þess að standa vörð um frelsi fólks.“
Dómsmálaráðherra lagði áherslu á að takmarkanir myndu ekki festast í sessi. „Fleiri stjórnmálamenn mættu tala á þennan hátt. Þeir gera það samt ekki margir, sannarlega ekki á vinstri væng stjórnmálanna. Stundum þarf einfaldlega að treysta á Sjálfstæðismenn. Alls ekki oft – en samt stundum.“