„Þetta eru furðulegir tímar og Landspítali komin á neyðarstig. Samvinna og samstaða er eina leiðin til að komast út úr þessum faraldri,“ segir Sandra B. Franks, formaður Sjúkraliðafélags Íslands.
Sandra sagði frá því í gærkvöldi að í dag færi hún á sína fyrstu bakvarðasveitarvakt. Fer hún á sinn gamla vinnustað, A6 í Fossvogi, sem nú er COVID-deild.
Eins og kunnugt er hefur Landspítalinn lýst yfir neyðarstigi vegna COVID-19 og þarf spítalann að takast á við mönnunarvanda vegna faraldursins. Sjúkraliðar voru hvattir til að skrá sig í bakvarðasveit heilbrigðisþjónustunnar í gær.
„Sjúkraliðar sem hafa aðstæður og eru reiðubúnir að starfa tímabundið til í heilbrigðisþjónustunni, með skömmum fyrirvara, hvort heldur í fullt starf, hlutastarf eða í tímavinnu, eru hvattir til að skrá sig í bakvarðasveitina,“ sagði á vef Sjúkraliðafélagsins.
Alma D. Möller landlæknir var ánægð með frumkvæði Söndru og skrifaði hún athugasemd undir færslu hennar á Facebook. „Kærar þakkir og góða vakt, frábær fyrirmynd.“