Valgerður Snæland Jónsdóttir, formaður sóknarnefndar Digraneskirkju, vill að öll stjórn Sinfóníuhljómsveitar Íslands segi af sér. Það segir hún á Facebook-síðu sinni í kjölfar frásagnar Bjarna Frímanns Bjarnasonar í gær um að hátt settur stjórnandi hljómsveitarinnar hafi brotið á honum og stjórn sveitarinnar svo hylmt yfir það.
„LOKSINS nær alvöru mál athygli ... Stjórn Sinfóníunnar verður öll að segja af sér ...,“ segir Valgerður á Facebook-síðu sinni og deilir fréttum af máli Bjarna Frímanns.
Valgerður sjálf var í vikunni, í frétt Fréttablaðsins, sökuð um andlegt og líkamlegt ofbeldi á vinnustað af kirkjuverði kirkjunnar, Sigríði Sigurðardóttur. Hún sagði frá því að Valgerður og önnur kona hafi meðal annars kreist hana á milli sín.
Í fréttinni kom einnig fram að Valgerður, og sóknarnefnd kirkjunnar, vilja fá séra Gunnar Sigurjónsson, fyrrverandi sóknarprestur, aftur til starfa en Agnes M. Sigurðardóttir biskup vék Gunnari úr embætti sóknarprests í kjölfar niðurstöðu óháðs teymis þjóðkirkjunnar sem taldi Gunnar hafa gerst sekan um kynferðislega áreitni, kynbundið ofbeldi og einelti gegn sex konum.