Flugvirkjar hjá Landhelgisgæslunni voru með tæplega 1,8 milljónir króna að meðaltali í heildarlaun á síðasta ári. Þeir hafa verið í verkfalli síðan 5. nóvember síðastliðinn en Áslaug Arna Sigurbjörnsdóttir dómsmálaráðherra greindi frá því í morgun að til stæði að setja lög á verkfallið.
Fréttablaðið greinir frá launakjörum flugvirkja og er vísað í svar frá Landhelgisgæslunni.
„Á árinu 2019 var heildarlaunakostnaður vegna þeirra 17 flugvirkja sem þá voru starfandi samtals 462.375.431 krónur. Ef frá eru dregin launatengd gjöld voru meðalheildarlaun flugvirkja hjá Landhelgisgæslunni 1.764.291 kr. á mánuði,“ segir í svarinu en grunnlaun á síðasta ári voru á bilinu 501.213 krónur til 1.162.931 krónur og að meðaltali 855.756 krónur.
Ekkert hefur gengið í samningaviðræðum flugvirkja og samninganefndar ríkisins en í gær höfnuðu flugvirkjar tillögu Aðalsteins Leifssonar ríkissáttasemjara um lausn í deilunni. Í tillögunni var meðal annars kveðið á um að flugvirkjar fengju sömu launahækkanir og kveðið var á um í aðalkjarasamningi þeirra við Icelandair sem undirritaður var ekki alls fyrir löngu.
Hér má sjá frétt Fréttablaðsins um launakjör flugvirkja.