Fjölskylda fjallgöngumannsins John Snorra hefur sent frá sér yfirlýsingu þar sem hún segir ákveðinni óvissu hafa verið eytt með fundi þess sem talið er vera lík fjallgöngumannsins skammt frá toppi K-2.
„Nú hefur ákveðinni óvissu verið eytt um afdrif Johns Snorra, Muhammad Ali Sadpara og Juan Pablo Mohr á K2 þann 5. febrúar sl., þar sem leitin af þeim hefur nú borið árangur,“ skrifar fjölskyldan í tilkynningu.
Fjölskyldan segir alfarið á hendi pakistanskra yfirvalda að ákveða hvort reynt verður að ná líkömum þeirra niður af fjallinu, aðstæður á K2 séu gríðarlega erfiðar.
„Samkvæmt upplýsingum frá Elia Saikaly, sem er á K2, að þá er staðsetning John og Ali fyrir ofan hinn svokallaða flöskuháls á K2 á meðan staðsetning Juan er mun nærri búðum 4. Miðað við aðstæður eru sterkar vísbendingar um að þeir hafi verið á leið niður af toppi fjallsins þegar þeir létust,“ segir fjölskyldan.
„Fjölskylda Johns vill þakka fyrir þann hlýhug, stuðning og umhyggju sem okkur hefur verið sýnd undanfarna mánuði og við viljum ítreka innilegar þakkir okkar til allra sem hafa tekið þátt í leitinni að þeim John Snorra, Ali og J Pablo.“, segir Lína Móey, eiginkona John Snorra.
Tilkynningin í heild sinni:
Nú hefur ákveðinni óvissu verið eytt um afdrif Johns Snorra, Muhammad Ali Sadpara og Juan Pablo Mohr á K2 þann 5. febrúar sl., þar sem leitin af þeim hefur nú borið árangur.
Það er alfarið á hendi pakistanskra yfirvalda að ákveða hvort reynt verður að ná líkömum þeirra niður af fjallinu, en aðstæður á K2 eru mjög erfiðar. Það er mikilvægt að öryggi þeirra aðila sem tækju þátt í slíkum aðgerðum verði tryggt ef tekin verður ákvörðun um að flytja þá niður í grunnbúðir.
Samkvæmt upplýsingum frá Elia Saikaly, sem er á K2, að þá er staðsetning John og Ali fyrir ofan hinn svokallaða flöskuháls á K2 á meðan staðsetning Juan er mun nærri búðum 4. Miðað við aðstæður eru sterkar vísbendingar um að þeir hafi verið á leið niður af toppi fjallsins þegar þeir létust.
Persónulegir munir, myndavélar og annar tækjabúnaður sem þeir höfðu meðferðis mun líklega varpa betra ljósi á það sem gerðist þennan afdrifaríka dag og m.a. svara þeirri spurningu hvort þeir hafi náð toppnum á K2. Stjórn þeirrar rannsóknar verður einnig á hendi pakistanskra yfirvalda og munu allar upplýsingar um niðurstöður koma frá þeim.
„Fjölskylda Johns vill þakka fyrir þann hlýhug, stuðning og umhyggju sem okkur hefur verið sýnd undanfarna mánuði og við viljum ítreka innilegar þakkir okkar til allra sem hafa tekið þátt í leitinni að þeim John Snorra, Ali og J Pablo.“, segir Lína Móey, eiginkona John Snorra.