Íslenskir fjölmiðlamenn klóra sér margir hverjir í kollinum yfir þeirri ákvörðun Ferðamálastofu að ætla að kaupa auglýsingar hjá erlendum samfélagsmiðlum til að auglýsa herferð sína í sumar.
Herferðinni er ætlað að hvetja Íslendinga til að ferðast innanlands í sumar. Morgunblaðið hefur meðal annars fjallað um málið og sagði Skarphéðinn Berg Steinarsson ferðamálastjóri að nauðsynlegt væri að nota erlenda samfélagsmiðla í þessum tilgangi. Þá hefur Þórdís Kolbrún Reykfjörð Gylfadóttir ferðamálaráðherra látið hafa eftir sér að hún sjái ekkert athugavert við þetta.
Fjölmiðlamenn eru margir hverjir undrandi á þessu og vilja einhverjir meina að verið sé að grafa undan rekstri íslenskra fjölmiðla.
Egill Helgason segir á Facebook-síðu sinni:
„Notkun íslenskra fjölmiðla er í hámarki núna á tíma faraldursins en Ferðamálastofa kaupir auglýsingar hér á Facebook og á Google. Er furða þótt maður sé ekki trúaður á að íslenskir fjölmiðlar eigi framtíð fyrir sér? Við förum hins vegar þangað til að leita upplýsinga á þessum uggvænlegu tímum. Þær upplýsingar er ekki finna á Facebook eða YouTube.“
Björn Ingi Hrafnsson, útgefandi og ritstjóri Viljans, tekur í svipaðan streng og segir átak íslenskra stjórnvalda kaldhæðnislegt.
„Það er stórkostlega kaldhæðnislegt að íslensk stjórnvöld ætli að markaðssetja átakið Veljum íslenskt á samskiptamiðlunum Facebook, Google og Instagram.“
Jakob Bjarnar Grétarsson, þaulreyndur blaðamaður á Vísi, segir íslenska fjölmiðla marga hverja ramba á barmi gjaldþrots.
„Þetta er með hinum mestu ólíkindum. Íslenskir fjölmiðlar, sem hafa sannað svo ekki verður um villst mikilvægi sitt hafi það farið á milli mála, á undanförnum vikum, ramba á barmi gjaldþrots, allir aðrir en ríkisfjölmiðillinn sem skilað góðum hagnaði síðast. Nýr útvarpsstjóri hefur einmitt boðað sókn á samfélagsmiðlum (sic).“
Jakob segir að samfélagsmiðlar séu á meðal þess sem grefur undan rekstri miðla á markaði. Þeir skili engu til samfélagsins og séu margir hverjir á mörkum þess að teljast siðlegir.
„YouTube svo dæmi sé tekið gerir út á nytsama sakleysingja sem stela höfundarréttarvörðu efni sem þeir YouTube-menn selja svo auglýsingar út á. Zuckerberg selur auglýsingar út á okkur sem sjáum líka um að framleiða kontentið fyrir hann hingað inn, auk fjölmiðla. Auk þess sem samfélagsmiðlar bera að verulegu leyti á upplýsingaóreiðu sem búið er að stofna sérstaka nefnd til að berjast gegn. En, auglýsingamenn sjá þetta ekki svona. Þeim er drull sama. Take the money and run.“