Lögreglan á Suðurnesjum stöðvaði í nótt 15 ára ökumann sem hafði boðið tveimur félögum sínum á rúntinn. Rætt var við foreldra drengjanna og málið tilkynnt til barnaverndarnefndar.
Þetta kemur fram í tilkynningu frá Lögreglunni ná Suðurnesjum.
Þar segir enn fremur að allmargir ökumenn hafi verið staðnir að hraðakstri í umdæminu á síðustu dögum. Sá sem hraðast ók mældist á 139 kílómetra hraða þar sem hámarkshraði er 90 kílómetra á klukkustund. Hann var jafnframt grunaður um ölvunarakstur og var því handtekinn og færður á lögreglustöð.
Höfð voru afskipti af níu ökumönnum sem óku á negldum dekkjum og voru tveir þeirra án ökuréttinda. Þrír óku með filmur í fremri hliðarrúðum bifreiða sinna og þurfa þeir að færa þær til skoðunar.
Loks voru höfð afskipti af ökumanni sem var með tvö börn í aftursæti bifreiðar sinnar, annað í barnabílstól en hvorugt þeirra í belti. Tveir ökumenn óku svo á ljósastaura og var annar þeirra grunaður um ölvunarakstur.