Það hvernig fólk klæðir sig segir oft á tíðum ýmislegt um manneskjuna. Prófgráður og starfsreynsla er því ekki eina það eina sem skiptir máli, til dæmis þegar fólk er að mæta í atvinnuviðtöl eða er með frekari frama á vinnustað sínum í huga.
Björn Teitsson, fyrrverandi blaðamaður og kynningarstjóri Krabbameinsfélagsins, deilir skemmtilegri færslu á Twitter þar sem hann bendir á athyglisvert dæmi um þetta. Hann segir:
„Þekki gaur sem er afar prúður og góður við menn og dýr. Var í ágætis starfi í stjórnsýslunni (segi ekki hvar) en ca. 2011 tók hann meðvitaða ákvörðun um að byrja að mæta í jakkafötum í vinnuna, bindi og alles, alltaf, án þess að þurfa. Hann fékk stöðuhækkun ca. 2 mánuðum síðar.“
Færsla Björns vakti talsverða athygli og benti Snærós Sindradóttir, fjölmiðlakona á RÚV, meðal annars á það að margir væru ekki búnir að átta sig á að það getur skipt sköpum fyrir líf þeirra hvernig það kemur fram. Má þar nefna klæðaburð, förðun í einhverjum tilfellum, og fas.
Björn svarar Snærósu þannig að hann viti ekki hvort það sé gott eða slæmt. En þessi tiltekni kunningi hans hafi átt skilið að fá stöðuhækkun þó hann hafi mætt í vinnuna í strigaskóm og í úlpu.
„Það næstum „skiptir ekki máli“ hvort það er gott eða slæmt - það er bara staðreynd að ef við lítum út fyrir að vera með hlutina okkar á hreinu þá yfirfærir fólk það á fleiri hliðar okkar. Stundum þýðir það hræðilega mismunun en stundum að við getum verið okkar gæfu smiðir,“ segir Snærós meðal annars en umræðurnar má sjá hér að neðan.
Þekki gaur sem er afar prúður og góður við menn og dýr. Var í ágætis starfi í stjórnsýslunni (segi ekki hvar) en ca. 2011 tók hann meðvitaða ákvörðun um að byrja að mæta í jakkafötum í vinnunna, bindi og alles, alltaf, án þess að þurfa. Hann fékk stöðuhækkun ca. 2 mánuðum síðar.
— Björn Teitsson (@bjornteits) January 24, 2021