Ólafur F. Magnússon, fyrrverandi borgarstjóri Reykjavíkur, vandar Degi B. Eggertssyni, núverandi borgarstjóra, og fleiri fyrrverandi borgarfulltrúum ekki kveðjurnar í aðsendri grein í Morgunblaðinu í dag.
Ólafur segist hafa orðið fyrir linnulausu einelti í sex ár, frá árinu 2007 og til ársins 2013, en eins og kunnugt var Ólafur borgarstjóri frá 10. janúar 2008 til 21. ágúst 2008. Ólafur hefur áður tjáð sig um þá meðferð sem hann mátti þola á sínum tíma, en tilefni greinarinnar nú er viðtal Útvarps Sögu á dögunum við Jens Guðmundsson, þekktan bloggara, um tíma Ólafs í borgarstjórn.
„Fyrsta útgáfa af ofsóknum og skrílmenningu á Íslandi var þegar hamast var á Ólafi F. Magnússyni þegar hann var settur í borgarstjóraembættið í janúar 2008. Allir flokkarnir létu þetta viðgangast og m.a.s. Rúv kom illa fram í því máli. Það var virkilega sótt að Ólafi og fólk var orðljótt og það var skelfilegt að fylgjast með þessu,“ sagði Jens meðal annars í viðtalinu og bætti við að Ólafur hefði verið krafinn um læknisvottorð þegar hann var að snúa til baka til starfa í borgarstjórn, starfa sem hann hafði verið kjörinn til.
Ólafur rekur söguna betur í grein sinni og bætir við að hann hafi hafið læknisstörf á ný þann 1. október 2007 eftir tæplega níu mánaða veikindi og hugsað að hefja störf í borgarstjórn með haustinu.
„Þegar nýr meirihluti myndaðist undir forystu Dags Eggertssonar 14. október 2007 vildi ég eðlilega koma fljótt aftur og nefndi 1. nóvember 2007 í símtali við Dag og hlustaði núverandi eiginkona mín á símtalið og getur staðfest viðbrögð Dags við áætlaðri endurkomu minni í borgarstjórn. Hann sagði: „Þú getur það ekki. Margrét Sverrisdóttir er búin að gera ráð fyrir launum sem forseti borgarstjórnar næsta hálfa árið“.
Ólafur segir að honum hafi liðið þannig eins og hann væri óvelkominn, en ákveðið að halda út fram í janúar 2008 þegar tilkynnt var um meirihlutamyndun Ólafs með Sjálfstæðisflokknum. Hann segir að allur borgarstjórnarflokkur F-listans hafi staðið á bak við hann, nema Margrét Sverrisdóttir og Guðrún Ásmundsdóttir, og engu hafi skipt þó hann næði fram fjölmörgum stefnumálum F-listans í málefnasamningum við Sjálfstæðismenn.
Ólafur segir að strax í kjölfarið hafi Björk Vilhelmsdóttir hafið rætna lygaherferð gegn honum þar sem farið var með svívirðileg orð um hann sem persónu.
„Sama dag stofnuðu þau til undirskriftasöfnunar gegn mér, Lísa Kristjánsdóttir, núverandi aðstoðarmaður Katrínar Jakobsdóttur, systir hennar og leikkonan Ilmur Kristjánsdóttir, „söngvaskáldið“ Hörður Torfason, Ellen Kristjánsdóttir söngkona og Anna Pála Sverrisdóttir, formaður Ungra jafnaðarmanna.“
Ólafur segisr svo að nemendum vinstrisinnaðra kennara í framhaldsskólum hafi verið safnað á pallana í ráðhúsið þar sem Ólafur fékk að heyra það.
„Meðal kjörorða skrílsins á pöllunum var „Þú ert enginn „fokking“ borgarstjóri,“ og „Farðu aftur á geðveikrahælið helvítis auminginn þinn.“
Ólafur segir að óhugnanlegt hafi verið að sjá forystumenn Samfylkingarinnar og Vinstri grænna í borgarstjórn, þau Dag Eggertsson og Svandísi Svavarsdóttur, veifa neðan úr borgarstjórnarsalnum til skrílsins sem var með steytta hnefa á pöllunum.
„Það skal þó tekið fram að þessi skrílslæti voru síst illgjarnari en þátturinn Spaugstofan á Rúv 26. janúar 2008. Óhætt er að fyllyrða að meirihluti fréttamanna og þáttastjórnenda á Rúv hafi verið meðal illvígustu andstæðinga minna í borgarstjóratíð og miklu lengur. Andúð Rúv í minn garð entist allt árið 2008, eins og sýndi sig með grimmilegu einelti gegn mér í áramótaskaupi í umsjón tveggja verðandi borgarfulltrúa, þeirra Ilmar Kristjánsdóttur og Jóns Gnarrs.“
Ólafur segir að eftir að setu hans í borgarstjórn lauk hafi í raun ekki betra tekið við.
„Mjög syrti í álinn 12. janúar 2012, þegar Dagur B. Eggertsson, formaður borgarráðs, fékk með sér alla meðlimi borgarráðs til að hefja lögsókn gegn mér og saka mig um fjárdrátt vegna borgarmálastyrks F-listans árið 2008 að upphæð kr. 3,4 milljónir. Þetta kom mjög á óvart, því að í síðustu ræðu minni í borgarstjórn, 1. júní 2010, lagði ég fram tillögu um lögreglurannsókn á nýtingu styrkja til borgarstjórnarflokkanna á kjörtímabilinu 2006-2010 að upphæð kr. 130.000.000. Sú tillaga var felld með atkvæðum allra annarra borgarfulltrúa.“
Ólafur segir að þessi „endurtekna, óvægna og tilefnislausa aðför“ gegn honum hafi staðið yfir frá 12. janúar 2012 til 31. ágúst 2013 og verið lokahnykkurinn í „atlögu“ Dags að lífi hans, heilsu og hamingju.
„Í liði með honum í borgarráði voru þau Samfylkingarkonan Björk Vilhelmsdóttir, „sjálfstæðismennirnir“ Hanna Birna Kristjánsdóttir (þekkt fyrir lygar) og Júlíus Vífill Ingvarsson (þekktur fyrir fjárdrátt), Sóley Tómasdóttir frá Vinstri grænum og þau Óttarr Proppé og Elsa Yeoman úr Besta flokknum.“