Miklar umræður hafa skapast á Facebook vegg Elliða Vignissonar, bæjarstjóra í Ölfusi, eftir hann ákvað að birta færslu um ofbeldi gangvart lögreglunni á Íslandi.
„Um allan heim mótmælir fólk nú eðlilega ofbeldi lögreglu í USA í garð almennings. Hér á Íslandi glímum við við ofbeldi almennings gagnvart lögreglu. #gerumbetur,“ skrifar Elliði og birtir þar mynd af bróður sínum Svavari Vignissyni lögreglumanni.
Fjölmargir hafa tekið til máls undir færslu Elliða og ekki eru allir sáttir með hann sé að tengja málefni lögreglunnar á Íslandi við hörmungaratvikið sem átti sér stað í Bandaríkjunum þegar George Floyd lést í haldi lögreglunnar.
„Þú ættir að eyða þessu í einum hvelli. Þetta er það vandræðalegasta sem nokkur manneskja hefur sett á facebook. Þú hlýtur að geta komið þessum skilaboðum áleiðis á smekklegri hátt,“ skrifar ein kona undir færslu Elliða.
„Allt saman ömurlegt, lögreglumenn í USA verða manni að bana, Íslenskir lögreglumenn rotaðir og frelsissviptir fyrir að "trufla partý". Svo er lögreglumaður drepinn nærri annan hvern dag í USA. Árásir á lögreglumenn og almenn óvirðing í þeirra garð er vaxandi vandamál hér á klakanum,“ skrifar annar maður.
Hægt er að lesa ummælin undir færslu Elliða hér.