„Detroit var eitt sinn vaxtarborg. Nú er öldin önnur,“ segir Eyþór Arnalds, oddviti Sjálfstæðisflokks í borgarstjórn, í aðsendri grein í Fréttablaðinu í dag.
Í grein sinni varar hann við gríðarlegri skuldasöfnun borgarinnar og bendir á margar stofnanir og fyrirtæki hafi yfirgefið Reykjavík undanfarið.
„Skuldir borgarinnar hafa vaxið hratt, en áður fyrr var Reykjavík nær skuldlaus. Skuldir A-hlutans á íbúa voru 530 þúsund krónur 2014 þegar núverandi borgarstjóri tók við taumunum. Að óbreyttu verða skuldir A-hlutans 1.500 þúsund krónur árið 2024 á hvert mannsbarn í borginni. Það er þreföldun á áratug. En sambærileg skuldatala Kópavogs er bæði lægri og hefur ekki hækkað á tíu árum,“ segir Eyþór meðal annars.
Margir þekkja sögu Detroit sem var miðpunktur bílaframleiðslu Bandaríkjanna lengi vel. Þegar hnignun varð í bílaframleiðslu jókst atvinnuleysi og á sama tíma jókst halli í rekstri borgarinnar sem á endanum varð tæknilega gjaldþrota.
Í pistli sínum nefnir hann Eyþór Detroit sérstaklega en ber einnig saman skuldasögu Reykjavíkurborgar og Kópavogs sem er um margt ólík.
„Reykjavíkurborg þrefaldar skuldir sínar en Kópavogur hefur hemil á skuldasöfnun. Og heildarskuldir borgarinnar fara í 3,3 milljónir árið 2024 á íbúa, en það er meira en tvöföld skuldatala Kópavogs. Ákvörðun Sýslumannsins á höfuðborgarsvæðinu, Tryggingastofnunar og Íslandsbanka, að flytja til Kópavogs, er afleiðing af skipulagsstefnu borgarinnar,“ segir hann og nefnir einnig að háir skattar í borginni, fáar hentugar lóðir til að byggja og skortur á góðri þjónustu ýti fólki, fyrirtækjum, störfum og stofnunum burt úr borginni.
„Samkeppnishæfni borgarinnar hefur veikst með háum sköttum og þungri stjórnsýslu. Tölurnar tala sínu máli. Þetta er saga tveggja ólíkra staða. Ólík stefna felur í sér ólíka þróun. Rúmlega sex þúsund manns bjuggu í Reykjavík í byrjun síðustu aldar. Vöxtur borgarinnar var ekki tilviljun. Hann varð vegna þess að hér var gerð hafnaraðstaða, vatnsveita, hitaveita, rafveita og byggingarland. Ákvarðanir byggja upp borgir. Detroit var eitt sinn vaxtarborg. Nú er öldin önnur. Það er mikilvægt fyrir borgina að bæta stöðu sína. Lækka kostnað og bjóða upp á hagkvæm byggingarsvæði. Þannig getum við vaxið án þess að skuldir vaxi um of. Þannig getum við verið raunhæfur valkostur fyrir fólkið og fyrirtækin.“