„Reykvíkingar borga hærra útsvar af launum sínum en þeir sem búa í nágrannasveitarfélögunum. Það er grundvallarkrafa að hér sé þjónustan í lagi. Og að hún standi öllum börnum til boða,“ segir Eyþór Arnalds, oddviti Sjálfstæðisflokksins í Reykjavík, í grein í Fréttablaðinu í dag.
Í grein sinni skrifar Eyþór um leikskólamál í Reykjavík en eins og Fréttablaðið greindi frá síðastliðinn föstudag er biðin eftir leikskólaplássi lengst í Reykjavík ef litið er til stærstu sveitarfélaganna á höfuðborgarsvæðinu. Kom fram að markmið höfuðborgarinnar væri að tryggja öllum börnum sem náð hafa 18 mánaða aldri pláss en dæmi séu um að tveggja ára börn komist ekki að. Í Garðabæ og Hafnarfirði er miðað við 12 til 15 mánaða aldur.
„Viðbrögð borgarstjórans við þessum fréttum er að þetta hafi komið honum á óvart. Þessi viðbrögð borgarstjórans eru ekki þau sem foreldrar búast við í Reykjavík árið 2020. Í nútímasamfélagi er gerð krafa til þess að borgin bjóði öllum börnum upp á að komast í leikskóla,“ segir Eyþór í grein sinni og bætir við að allir séu sammála um það að fyrsta skólastigið sé mikilvægt.
„Sú krafa að allir eigi rétt á að komast í skóla á við um leikskólann, ekkert síður en grunnskólann. Eitt af stóru kosningaloforðum borgarstjóra fyrir síðustu kosningar var að öll 12 mánaða börn fengju leikskólapláss. Nú eru liðin meira en tvö ár frá kosningum. Það eru nokkuð margir vinnudagar.“
Eyþór bendir á að ástandið á vinnumarkaðnum hafi gjörbreyst á þessum tveimur árum og mönnun ætti í raun að vera auðveldari nú en áður.
„Áætlanir sem gerðar voru af borgarstjóra 2018 ættu því að standast. Þörfin fyrir leikskólarými lá fyrir og liðin eru meira en tvö ár til undirbúnings. Hann hefur þó lofað því að útrýma biðlistunum í leikskólunum í Reykjavík frá síðustu aldamótum eða frá árinu 2002. Meirihluta þess tíma hefur hann sjálfur verið við stjórn borgarinnar. Verkefnið ætti því ekki að koma honum á óvart. Á meðan börn í Reykjavík sem eru tveggja ára gömul fá ekki leikskólapláss eru loforð Samfylkingarinnar um að 12 mánaða börn komist inn ekki pappírsins virði.“