Ekkert verður af Menningarnótt í Reykjavík í ár vegna Covid-19 faraldursins. Þetta kemur fram á vef Fréttablaðsins. Neyðarstjórn Reykjavíkurborgar fundaði um málið í morgun og tók ákvörðun um örlög afmælishátíðarinnar. Dagur B. Eggertsson borgarstjóri segir neyðarstjórn borgarinnar hafi verið einhuga í ákvörðun sinni.
Þetta er í fyrsta sinn frá árinu 1996 sem Menningarnótt fer ekki fram en afmælishátíðin er haldin ár hvert helgina eftir afmæli Reykjavíkur þann 18. ágúst.
Nauðsynlegt að sýna ábyrgð
„Þetta er auðvitað leitt en við verðum öll að sýna ábyrgð og lágmarka hættu á smitum í samfélaginu,“ sagði Dagur um ákvörðunina.
Fyrr í sumar stóð til að dreifa hátíðardagskránni yfir tíu daga tímabil en í ljósi hertari samkomureglna þótti rétt að aflýsa henni. „Við höfðum verið að skoða ólíkar útfærslur á hátíðinni en í ljósi þróunar síðustu daga og vikna töldum við réttast að aflýsa Menningarnótt í ár,“ ítrekaði borgarstjóri.
Það er von Reykjavíkurborgar að hátíðin verði enn kraftmeiri á næsta ári.