Katrín Jakobsdóttir forsætisráðherra segir tillögur um aukinn stuðning til leigjenda séu ekki hugsaðar til að fita efnahagsreikning leigufélaga heldur til stuðnings almennings.
Fréttablaðið greinir frá.
Mikil umræða hefur skapast í kjölfar þess að 65 ára öryrki steig fram fyrr í vikunni og greindi frá síður skemmtilegri jólagjöf frá leigufélaginu Ölmu þar sem henni var tilkynnt um 75 þúsund króna hækkun á leigu.
Starfshópur á vegum innviðaráðherra vinnur að endurskoðun húsaleigulaga með það að markmiði að bæta réttarstöðu og húsnæðisöryggi leigjenda.
Fjöldi fólks er sagður á vergangi og færst hefur í vöxt að Íslendingar sofi í bílum. Á sama tíma skilaði Alma 12,5 milljarða króna hagnaði á síðasta ári.
„Stjórnvöld hafa verið að vinna tillögur um aukinn húsnæðisstuðning en hann er ekki hugsaður til að fita efnahagsreikning leigufélaganna heldur til að styðja við fólkið í landinu,“ segir Katrín og heldur áfram:
„Ég vil ítreka mikilvægi þess að leigufélögin sýni sanngirni, gangi fram af hófstillingu og leggist á árarnar með okkur til að greiða fyrir farsælum kjarasamningum á verðbólgutímum,“ segir Katrín og bætir við að það sé morgunljóst að setja þurfi miklu skýrari ramma í löggjöf um leigumarkaðinn.
Umfjöllun Fréttablaðsins má lesa í heild sinni hér.
