Elísabet Guðmundsdóttir, læknir og talskona gegn sóttvörnum, birtir myndband í opinni færslu á Facebook-síðu sinni í morgun af því þegar hún var handtekin af lögreglu. Myndbandið var tekið í gærkvöldi en bifreið Elísabetar var stöðvuð við Fjarðahraun í Hafnarfirði á tólfta tímanum.
Það vakti mikla athygli í desember þegar Elísabet neitaði að fara í sýnatöku og sóttkví við komuna til landsins frá Danmörku. Daginn eftir komuna til landsins fór hún á mótmæli sem haldin voru í miðborg Reykjavíkur gegn sóttvarnaraðgerðum stjórnvalda.
„Handtekin, handjárnuð og barin,“ segir Elísabet í færslu með öðru af tveimur myndböndum sem hún hefur birt í morgun. Á fyrra myndbandinu má sjá þegar lögreglumenn biðja hana um að koma með sér niður á lögreglustöð. Svo virðist vera sem lögregluþjónarnir hafi stoppað hana fyrir að mæta ekki á tilsettum tíma í skýrslutöku og því hafi hún verið eftirlýst.
Elísabet tók illa í beiðni lögregluþjónanna og sagði við þá að þeir þyrftu þá að bera hana. Lögregluþjónninn opnar þá dyrnar á bíl hennar og biður hana að koma með sér auk þess að tilkynna henni að hún sé handtekin. Til orðaskipta kemur á milli Elísabetar og lögreglumannsins og á einum tímapunkti heyrist lögregluþjónninn segja: Þú sparkar ekki í lögreglumann.“
Með Elísabetu í bílnum er vinur hennar sem tekur atburðarásina upp á myndband. Á myndbandinu sést þegar hann fer út úr bifreiðinni og er mjög æstur. „Verið þið góðir við hana! Annars er mér að mæta,“ segir hann meðal annars. Elísabet heyrist í bakgrunni gráta hástöfum. Þess má geta að maðurinn sem tekur upp myndbandið er sá hinn sami og birti myndband af sér þegar hann var grímulaus í verslun Bónus í nóvembermánuði.
Ekki náðist í Elísabetu við vinnslu fréttarinnar til að spyrja hana frekar út í uppákomuna.
Skúli Jónsson, stöðvarstjóri hjá lögreglunni í Hafnafirði, þvertekur fyrir það í samtali við Fréttablaðið að Elísabet hafi verið lamin eins og hún segir í færslu með öðru myndbandinu.
„Hún sinnti ekki kvaðningu út af málinu þegar hún kom erlendis frá. Við birtum henni kvaðningu og hún átti að mæta í yfirheyrslu þegar sóttkví lauk en mætti ekki og þetta er framhald af því. Hún var yfirheyrð og látin laus,“ segir Skúli. Hann segir málinu lokið af þeirra hálfu og það fari næst til ákærusviðs sem tekur ákvörðun um framhaldið. „Lögregla er ekkert að berja fólk, það er svoleiðis. Hún var handtekin út af þessu máli,“ segir Skúli að lokum.