Elísa Elínar, ung einstæð móðir, var orðlaus þegar hún opnaði umslag sem rennt var inn um bréfalúguna á heimili hennar í gærkvöldi. Elísa segir frá þessu í færslu á Facebook sem hún gaf Hringbraut góðfúslegt leyfi til að fjalla um.
Í umslaginu var inneignarkort í Bónus og segir Elísa að á kortinu hafi verið inneign fyrir 20 þúsund krónur. Sannarlega eitthvað sem kemur sér vel fyrir unga og einstæða móður núna rétt fyrir jólin.
Elísa segir að umslaginu hafi verið rennt inn um lúguna og svo dinglað á bjölluna. Sá sem gaf henni gjöfina var á bak og burt þegar hún opnaði og því hefur hún ekki hugmynd um hver var þarna að verki. Hún segir við Hringbraut að líklega hafi þarna verið einhver að verki sem er náinn henni og sonum hennar. Enginn hefur gefið sig fram en á umslaginu stendur:
Til: Elísu ofurkonu
Frá: Einhverjum sem trúir á þig!
Í færslu sinni í gærkvöldi segist Elísa hafa verið með tárin í augunum yfir þessum skilaboðum og þessari gjöf. „Ég veit ekki hver gerði þetta og get því ekki þakkað fyrir mig en hver sem þú ert - TAKK svo innilega fyrir þessi skilaboð og að létta undir hjá mér. Vá hvað það er til hjartahlýtt og fallegt fólk. Ég mun klárlega taka þetta góðverk mér til fyrirmyndar.“