Héraðsdómur Norðurlands eystra hefur dæmt konu tvær milljónir króna í bætur eftir að ekið var á hana og hundinn hennar á Akureyri í nóvember 2017. Konan var að ganga yfir gangbraut með hundinn sinn þegar bifreið var ekið á þau. Konan slasaðist á fæti en hundurinn drapst samstundis.
Í dómi kemur fram að konan hafi fótbrotnað og þurfti hún að dvelja á sjúkrahúsi í fimm daga. Áreksturinn var nokkuð harður og kastaðist konan um fimm metra út af akbrautinni en hundurinn kastaðist rúma 20 metra.
Fyrir dómi var deilt um það hvort ökumaður bifreiðarinnar hefði sýnt af sér stórfellt gáleysi þegar hann ók á konuna og hundinn. Bifreiðin er talin hafa verið á 63 til 72 kílómetra hraða, en 50 kílómetra hámarkshraði er á þeim slóðum sem slysið varð, á Hörgárbraut, skammt norðan Glerárbrúar. Veður var ágætt þegar slysið varð, hiti rétt fyrir neðan frostmark og myrkur úti en ljós frá ljósastaurum við akbrautina.
Að mati dómsins gætti ökumaður ekki að því að haga ökuhraða eftir aðstæðum, er hann ók umfram hámarkshraða á 63 til 72 kílómetra hraða án þess að hafa athygli á gangbrautinni sem var fram undan og merkt sem slík.
„Af framburði stefnda B sjálfs og vettvangsrannsókn lögreglu er sýnt að hann átti aðeins tæplega sex metra ófarna að gangbrautinni þegar hann sá stefnanda og brást við með því að hemla og beygja til vinstri en þá var það orðið of seint. Þykir liggja fyrir að stefndi B hafi ekki haft þá athygli á akstrinum sem honum bar og er það mat dómsins að það frávik frá þeirri háttsemi sem honum bar að viðhafa við þær aðstæður sem uppi voru feli í sér stórfellt gáleysi af hans hálfu. Hefur hann með því bakað sér bótaskyldu,“ segir í niðurstöðu dómsins.
Var maðurinn og tryggingafélag hans Vörður dæmd til að greiða konunni sameiginlega tvær milljónir króna ásamt vöxtum. Þá var þeim gert að greiða sameiginlega sakarkostnað, samtals tæplega 1,2 milljónir króna.
