„Að hafa allt í drasli er strangt til tekið ekki umhverfismál, heldur hreinlega sjálfsvirðingarmál,“ segir Einar Bárðarson, umboðsmaður, almannatengill og plokkari, í aðsendri grein í Fréttablaðinu í dag.
Einar skrifar þar um stóra plokkdaginn sem haldinn var í fjórða sinn nú á dögunum. Sífellt fleiri bætast í hóp plokkara – enda ekki vanþörf á – en Einar bendir á að nú séu um sjö þúsund meðlimir í Facebook-hópnum Plokk á Íslandi.
Einar fer svo yfir stöðu mála í dag og segir að breytingar sem gerðar voru á lögum um afhendingu ókeypis plastpoka hafi heldur betur skilað sér. „Innkaupapokar og litlu ávaxtapokarnir sem voru mjög andstyggilegir viðureignar eru svo gott sem horfnir úr náttúrunni og það eru í raun algjör tímamótatíðindi.“
Einar vill að næsta skref í átt að bættri umgengni og óþarfa rusli í umhverfinu sé bann á flutningi rusls eða léttvarnings á opnum kerrum eða pallbílum.
„Það er skelfilegt að horfa á eftir rusli fjúkandi af kerrum og vörubílum, jafnvel á leiðinni í urðun. Það á stóran þátt í því hversu óendanlega sóðalegt er í kringum okkar stærstu umferðarmannvirki. Umferðareyjur, gróður á hringtorgum, vegrið, hljóðmanir og gróður í vegköntum um alla borg eru stútfull af plasti, pappa og öðru ógeði sem er okkur öllum til skammar.“
Einar segir að þau svæði sem hann nefnir séu ekki svæði fyrir einstaklinga eða grasrótarsamtök að þrífa.
„Hámarkshraði á þessum stöðum er oftast 50 km eða hærri. Þetta eru svæði fyrir atvinnufólk að taka og bæði vegagerð og sveitarfélög þurfa bæði að auka tíðni þrifa og efla þau á þessum svæðum. Í hruninu voru gerðar alls kyns breytingar á umhirðu á þessum svæðum sem löngu er tímabært að færa í fyrra horf eða jafnvel enn betra horf.“
Einar bendir á að snjómokstur hafi verið í lágmarki í vetur og vill hann hvetja samgönguráðherra, borgar- og bæjarstjóra að skilja brot af þeim sparnaði eftir „í vegarkantinum“ eins og hann orðar það og efla þrif í kringum helstu umferðaræðar landsins.
„Úrræði ríkisstjórnarinnar eru sérstaklega vel til þess fallin að kalla inn mannskap bæði hjá vegagerð og sveitarfélögum. Þá eru undirverktakar sveitarfélaganna í þessum verkefnum örugglega mjög vel í stakk búnir að taka á sig meiri verkefni þessu tengd.“
Einar segir að ef fólk keyrir til og frá vinnu í umhverfi þar sem allt er í drasli hefur það letjandi áhrif á fólk. „Að hafa allt í drasli er strangt til tekið ekki umhverfismál, heldur hreinlega sjálfsvirðingarmál. Þetta er okkar umhverfi, þetta er okkar framtíð.“