„Ég á ekki til orð yfir nýju plötuna hennar Bríetar til að gera hrifningu minni nægjanlega góð skil. Ég hef fylgst með henni lengi og séð hana þroskast og eflast sem söngkona en ekki síst sem lagahöfundur,“ segir Einar Bárðarson, lagahöfundur og þúsundþjalasmiður.
Einar hrósaði tónlistarkonunni Bríeti í hástert á Facebook-síðu sinni í dag en plata hennar, Kveðja, Bríet, kom út á dögunum og er óhætt að segja að henni hafi verið vel tekið.
„Lögin sem hún og Pálmi (Ragnar Ásgeirsson) eru að semja og vinna í þessari plötu er algjör unun fyrir eyrun. Mikið hjarta í textunum og næmni í öllu útsetningum og hvert lagið á fætur öðru ögrandi en samt svo áreynslulaus í flutningi og fullkomlega laus við alla tilgerð,“ segir hann.
Einar segist ekki vera í nokkrum vafa um að snemma á þessari öld hefði platan selst í að minnsta kosti 20 þúsund, ef ekki 30 þúsund, eintökum.
„Það hefði sett hana á stall með Mugison, Ásgeiri Trausta, Garðari Thór og hugsanlega fleirum .. hvað plötusölu á heimamarkaði varðar. Nú er öldin hreinlega önnur og raun tölur Spotify gefa strax til kynna að þjóðin er kol fallin fyrir Bríeti og það þarf ekkert að telja út jólasöluna til að átta sig á því,“ segir Einar sem endar færslu sína á Facebook með þessum orðum:
„Ég óska henni og Pálma og öllum þeim sem eru að vinna með henni til hamingju með þetta frábæra verk og ykkur öllum mikill heilla í framtíðinni.“