Einar Bárðarson, almannatengill, plokkari og þúsundþjalasmiður, segir að fleiri landsmenn þurfi að vera eins og hvunndagshetjan Örlygur Sigurjónsson.
Örlygur er einn virkasti plokkari landsins og segir hann að við Íslendingar eigi honum mikið að þakka þó að fæst okkar þekki hann. „Síðan grímunotkunin fór af stað hefur hann tínt upp úr umhverfinu okkar 1.290 stykki af einnota grímum. Þessi eini maður,“ segir hann í grein sinni í Fréttablaðinu í dag.
Einar segir að andlitsgrímurnar hafi reynst okkur ágætlega í baráttunni við COVID-19. Við höfum verið dugleg að nota þær og fer umhverfið okkar ekki varhluta af því eins og margir hafa eflaust tekið eftir.
„En það er enginn þarna úti sem hendir grímu viljandi. Þær fjúka út úr bílunum okkar þar sem þær liggja á milli sætanna þegar margar hurðir eru opnaðar í einu í roki. Þær sogast óvart upp úr vösunum okkar þegar við sækjum símann eða lyklana í vasann. Þær fjúka upp úr ruslatunnunum á ljósastaurunum og fyrir utan fjölsótta staði þegar við pössum ekki nægilega vel að þær fari nógu djúpt ofan tunnurnar.“
Einar nefnir að þetta séu grímurnar okkar og við verðum einfaldlega að gera betur. „Það eru ekki einhverjir sóðar þarna úti sem henda grímum viljandi. Það er bara ekki þannig og að ýta ábyrgðinni frá okkur sjálfum með þeirri sannfæringu er ódýrt og óábyrgt.“
Einar hefur á síðustu árum komist hægt og hægt að þeirri niðurstöðu að á Íslandi eru kannski tólf til fimmtán alvöru sóðar. „Hitt eru slys hjá vel meinandi fólki, fólki eins og mér og þér. Þess vegna bið ég okkur öll að gæta að grímunni.“
Einar segir að Örlygur ætli ekki að hætta í 1.290 grímum, hann ætli ekki að hætta fyrr en umhverfið er orðið grímulaust. Hvetur hann alla til að leggja hönd á plóg.
„Hjálpum Örlygi að komast heim til sín. Gætum að grímunum. Verum eins og Örlygur, byrjum öll á einni grímu á dag. Það eru 365 grímur á mann á ári. Það er 131 milljón gríma ef við gerum þetta öll. Það ætti að leysa þetta.“
