Alda Lóa Leifsdóttir, eiginkona Gunnars Smára Egilssonar, frambjóðanda Sósíalistalfokksins, mærir eiginmann sinn í einlægri færslu á Facebook.
Þar segir hún fátt hallærislegra en eiginkona stjórnmálamanns og tekur fram að hún kjósi sér ekki það hlutverk. Hún segist ekki hafa ætlað sér að blanda sér í kosningabaráttu Gunnars Smára.
Hún segist þó vera í Sósíalistaflokknum og styðja málefnið heilshugar. Alda segir að sér finnist athyglin ekki góð.
„En Smári er öðruvísi. Hans veröld er svo stór, svo stór að hann getur alltaf komið mér á óvart. Og verandi úr svona stórri veröld þá getur hann gefið mörgum von, blásið baráttuanda í heilu herina, málað upp markmið sem fjöldi fólks heillast af og hjálpar honum svo við að ná,“ skrifar Alda.
Hún segir eiginmann sinn hafa gert þetta þegar hann byggði upp Fréttablaðið, þegar hann bjargaði fjárhagsstðu SÁÁ, þegar hann breytti Fréttatímanum í málgagn þeirra sem minna mega sín og þegar hann ákvað einn daginn að stofna Sósíalistaflokk Íslands.
„Hann gerði þetta auðvitað ekki einn, en hann er eldurinn sem kveikir upp baráttuna,“ skrifar Alda. Hún segir það hafa verið ævntýralegt að hafa fylgt þessum manni í meira en kvartöld, enginn dagur sé eins, ný ævintýri, taka alltaf við og allt hefur svo mikla merkingu. „Þess vegna elska ég Smára. Hann er stór.“
Skrímsladeildin elt hann
„En þessu hafa fylgt skuggar. Alla þessa öld hefur skuggi Sjálfstæðisflokksins og skrímsladeildar hans legið yfir heimili okkar,“ skrifar Alda. Hann hafi verið útmálaður hættulegur maður þegar hann var á Fréttablaðinu og felldi Moggann, grafið hafi verið undan starfi hans í SÁÁ.
„Þegar hann var á Fréttatímanum var legið í þeim sem komu með honum að blaðinu um að snúa við honum baki. Þegar hann studdi framboð Sólveigar Önnu í Eflingu var hann sakaður um að ætla að ræna sjóðum stéttafélagsins. Og þegar Sanna bauð sig fram til borgarstjórnar var hún spurð hvernig hún gæti verið í sama flokki og svona vondur maður. Smári þarf ekki einu sinni að vera í framboði til að kosningar snúist um hann.“
Hún segir skrímsladeild Sjálfstæðisflokksins hafa elt Gunnar Smára í þessari kosningabaráttu. „Ástæðan er auðvitað að þau óttast hann. Þau eru fá sem þola álíka árásir áratugum saman og halda áfram að berjast,“ skrifar Alda.
„Ég hef sjálf oft verið að bugast. Það er ekki gaman að búa á heimili sem er undir linnulausum árásum valdamesta fólks landsins. Stundum skil ég ekki hvers vegna það læðist að mér skömm yfir þessu ástandi, eins og við berum ábyrgð á því en ekki ofbeldisfólkið sem kemst upp með að ráðast á og reynir að buga allt fólk sem rís upp gegn valdi þess. Stundum er ég við það að missa trú á samfélaginu. Og ég er þar núna, þar sem ég skrifa þetta. Kannski mun ofbeldisfólkið alltaf vinna. Kannski er von okkar hinna ekki nógu sterk.“