Gylfi Jens Gylfason, eigandi Ölvers sportbars, furðar sig á heimsókn Þórólfs Guðnasonar, sóttvarnarlæknis og Víðis Reynissonar, á Hamborgarafabrikkuna, þar sem þeir gæddu sér nýverið á nýjum hamborgara. Hann segist líka myndu bjóða þeim til sín ef hann gæti.
Greint var frá því í Fréttablaðinu um helgina að Þórólfur hefði loks smakkað „heiðursborgara“ sem nefndur var Rúdólfur í höfuðið á honum, á Hamborgarafabrikkunni í síðustu viku. Mynd af Þórólfi að bragða borgarann, ásamt Jóhannesi Ásbirnssyni eiganda Fabrikkunnar og Víði Reynissyni yfirlögregluþjóni, fylgdi fréttinni. Félagarnir þrír gátu leyft sér að vera nokkuð innilegir en bæði Víðir og Jóhannes hafa fengið Covid-19 og eru með mótefni.
„Ég mundi líka bjóða Þórólfi upp á hamborgara ef ég gæti. Þórólfur hefur hins vegar komist að þeirri hávísindalegu niðurstöðu með fulltingi heilbrigðisráðherra að neysla hamborgara á Sportbarnum Ölver feli í sér aukna smithættu á Covid 19 umfram aðra veitingastaði og skuli því vera lokað,“ skrifar Gylfi.
Þá hnýtir hann einnig í Þórólf fyrir að sitja svo nálægt sessunautum sínum. Líkt og alþjóð líklegast veit eru kráareigendur afar ósáttir með aðstæður sínar, en þeim sem ekki hafa veitingaleyfi, hefur verið gert að hafa lokað svo mánuðum skiptir. Ljóst er að Hamborgarafabrikkan hefur haft opið allan tímann en ekki Ölver.
„Ég get þó lofað Þórólfi því að ég mundi ekki gera kröfu um myndatöku í auglýsingaskyni og alls ekki gera kröfu um faðmlag. Það eru jú tilmæli um fjarlægðarmörk sem ber að virða. Við erum öll í þessu saman eða næstum því að minnsta kosti,“ skrifar Gylfi.
Þórólfur segist ekki vera sammála túlkun Gylfa á myndinni, í samtali við Vísir.is. Hann segir hana ekki óheppilega.
„Nei, ég er ekkert sammála því. Veitingastaðir eru opnir og báðir þessir aðilar eru búnir að fá Covid, þannig að það var allt saman innan þeirra marka sem við erum sjálf að predika. Það getur vel verið að menn séu ósáttir við að krár megi ekki hafa opið til dæmis, en í þessu tilfelli held ég að það hafi verið farið alveg eftir reglum.“
