„Það er eiginlega brjálæðislegt hversu hátt hlutfall flugfarþega greinist nú með kóvídsmit,“ segir sjónvarpsmaðurinn Egill Helgason á Facebook-síðu sinni.
Egill vísar í tölur sem birtar voru í morgun þess efnis að tuttugu og sex smit hefðu greinst á landamærunum í gær. Eins og flestir vita eru áætlunarferðir til landsins ekki mjög tíðar um þessar mundir og því ekki mjög margir farþegar að baki þessum tölum.
„Maður hugsar – hvílíkt magn af veiru er að berast hér inn fyrir landsteinana! Nú er búið að aflétta ýmsum samkomutakmörkunum og skólar eru opnir – en er nema tímaspursmál hvenær breska afbrigðið fer að breiðast út hér og allt fer að loka aftur?“
Faraldurinn víða í vexti
Kórónuveirufaraldurinn hefur verið í örum vexti víða í kringum okkur og endurspeglast það vel í fjölda smita sem greinast á landamærunum. Sem fyrr segir greindust 26 smit í gær; sex greindust í fyrri skimun og fjögur í seinni skimun. Tveir voru með mótefni og beðið er niðurstöðu mótefnamælingar frá fjórtán manns. Ekki hafa áður greinst jafn mörg smit á landamærunum síðan faraldurinn hófst.
Eins og flestir vita tóku breytingar á samkomubanni gildi á miðnætti og mega nú tuttugu koma saman í stað tíu áður. Þá hafa líkamsræktarstöðvar opnað aftur, með ströngum skilyrðum þó, og þá mega veitingastaðir taka á móti tuttugu gestum í stað fimmtán áður. Reglurnar gilda til 17. febrúar næstkomandi.
Þórólfur Guðnason sóttvarnalæknir lagði til í síðustu viku að allir þeir sem koma til landsins yrðu skyldaðir í sýnatöku á landamærunum. Svandís Svavarsdóttir heilbrigðisráðherra varð ekki ekki við þeirri tillögu en þeir sem neita að fara í sóttkví þurfa þess í stað að fara í fjórtán daga sóttkví í farsóttarhúsi.
Segjast ætla að hunsa sóttkví komist þeir til landsins
Þó nokkrir taka þátt í umræðunum undir færslu Egils. Ein bendir á að trúlega fari margir sem koma til landsins í matvöruverslanir, jafnvel áður en niðurstöður úr prófum berast. „Veit allavega dæmi þess. Vildi helst kyrrsetja þá sem koma til landsins þangað til niðurstöður liggja fyrir,“ segir ein.
Þá segist ein hafa fylgst með umræðum ungra Frakka á Facebook þar sem þeir leita ráða til að komast til Íslands, ýmist til að leika sér, ferðast um landið að vetri til eða leita sér að vinnu.
„Í 90% tilfella ætla þeir að hunsa sóttkví ef þeir eru skikkaðir til þess. Þeir sem svara hundskamma þá en það má alveg lesa úr þessu almennan brotavilja. Enn meira ástæða til að herða kröfurnar við komuna til landsins - og eftirlitið.“
